„Вие, бесребреници, се просветливте како добросјајно злато, со божествената благодат на исцеленија збогативте мнозина. Затоа имајте милост кон нас, кои сме бранувани од лути напади на искушенија“ (песна од канонот на Утрена на свети бесребреници и чудотворци Козма и Дамјан).
На 14.11.2019 година, на денот на светите бесребреници и чудотворци Козма и Дамјан, во храмот „Св. Козма и Дамјан“ („Св. Врачи“) во Охрид, беше отслужена света архиерејска Литургија, на која чиноначалствуваше Неговото Високопреосвештенство Митрополитот Плаошко-струшки и Дебарско-кичевски и Администратор Австралиско-сиднејски г. Тимотеј, во сослужение на протоерејот-ставрофор Никола Христоски, протоерејот Љупчо Симиџиески, свештениците Горан Ставрески и Љупчо Бакрачески и протоѓаконот Николче Ѓурѓиноски. По завршувањето на Литургијата, беше извршен чинот на Мал водосвет и беше прекршен празничниот колач, а Митрополитот Тимотеј се обрати кон верниците со пригодна беседа, која интегрално ви ја пренесуваме.
Nike sneakers | Nike Shoes, Sneakers & Accessories
Митрополит Тимотеј
Во името на Отецот и Синот и Светиот Дух.
Драги браќа и сестри,
Денеска нашата света Црква прославува двајца угодници Божји кои добиле епитет „бесребреници". Тоа се браќата Козма и Дамјан. Нашиот Спасител Господ Исус Христос постојано нѐ поучува како треба да се бориме против гревот, ако сакаме да бидеме Негови вистински следбеници и проповедници. Затоа секоја христијанска душа во својот живот е изложена на разни искушенија и страдања, кои придонесуваат да отстапиме од патот којшто е определен од Бога а води кон вечен и блажен живот. Постојат многу гревови кои не оттргнуваат од нашето спасение. Но, почеток на гревот е гордоста кај луѓето. Гордоста не му дава на човекот реално да го согледа својот однос, како кон своите блиски со кои секојдневно се среќава и комуницира, така и кон Бога и кон Неговата спасоносна Евангелска наука. Гордиот човек живее во еден нереален свет кој самиот го создава и перцепира, па затоа сите околу себе ги потценува, презира, омаловажува, а себеси се претставува како најдобар и најспособен во секоја област и на крајот и безгрешен. Кога човек ќе биде обземен од овој грев со целокупното свое битие, тогаш многу полесно тој создава благопријатна почва и за многу други гревови, кои наоѓаат сместување во неговиот ум, срце и душа. Еден од таквите кој најчесто не демне нас луѓето, а не секогаш е директно поврзан со гордоста е среброљубието. Затоа Господ Христос вели: „Кој сака да врви по Мене, нека се откаже од себе и нека го земе својот крст и нека оди по Мене". (Мк. 8, 34) Ваквото откажување од себе што го бара Христос, не значи дека ние не треба да водиме грижа за нашиот живот, за нашите семејства, за нашите деца и за сѐ она што е неопходно и потребно за наше психофизичко, нормално и христијанско живеење како чесни и искрени луѓе и верници. Христос од нас бара нашето срце и нашите постапки да не бидат прекумерно приврзани за земниот живот на сметка на духовниот, односно животот да не се сведе на сецела грижа за телото, а запоставување на душата. Човек оптоварен со гревот на среброљубието ги игнорира сите духовни вредности и севкупниот свој човечки потенцијал го усмерува и троши само во создавање на земни блага, кои не му носат полза и спасение на неговата душа. Ние од Евангелската парабола знаеме за богатиот човек кој ѝ рекол на својата душа: „Душо, имаш многу добра, приготвени за многу години; јади, пиј и весели се! Но Бог му рече: Безумниче, ноќеска ќе ти ја земам душата. На кого сето тоа ќе му го оставиш?" (Лк. 12, 20-21).
Токму овие примери од Евангелието не поучуваат и нас да водиме повеќе грижа за душата и духовните вредности, отколку за телото и земните угодности.
Светите бесребреници Козма и Дамјан и покрај тоа што имале можност добро да спечалат и да се збогатат во овој свет со познавањето на медицината и лекарствата, тие дале завет и пред Бога и пред себе, од никого да не примаат ништо материјално, ниту, пак, да слушаат пофалби и благодарности. Тие биле цврсто уверени дека заради нивниот искрен и чесен живот и нивните молитви, Бог им дал таква исцелителна сила на лекарствата што тие ги подготвувале од различни билки и дека тоа не е само нивна мудрост, умешност и вештина. Затоа Бог делувал преку нив, помагајќи му на родот човечки и поучувајќи нѐ да водиме повеќе грижа за душата отколку за телото. По молитвите на светите Козма и Дамјан, така нека биде. Амин.
Свети Козма и Дамјан
Храм „Свети Врачи - Козма и Дамјан", Охрид
14.11.2019 год.