„На Крстот се прикова, Животе на сите, и во мртвите се вброи, бесмртен Господи. Си воскреснал по три дена, Спасителе, откако го подигна со Себе Адама од распадливоста. Поради тоа небесните сили Ти викаа: Животодавче Христе, слава на Твоето Воскресение, слава на Твоето снисходење, единствен Човекољупче“ (воскресен седален во Недела на Утрена глас 1-ви).
На 30.06.2019 година, во Втората недела по Педесетница и на празникот на св. маченици Мануил, Савел и Исмаил и на преп. Јосиф и Пиор, Неговото Високопреосвештенство Митрополитот Плаошко-струшки и Дебарско-кичевски и Администратор Австралиско-сиднејски г. Тимотеј, во сослужение на протоерејот-ставрофор Никола ХРистоски, свештениците Ромео Петрески, Александар Крстаноски и Александар Димоски и протоѓаконот Николче Ѓурѓиноски, изврши преосветување на светиот престол во храмот „Св. вмч. Ѓорѓи Победоносец“ во с. Врбјани, општина Дебарца, Охрид. Храмот е изграден во 1605 година, а сега се направи нов престол, иконостас и под, а направена е и дренажа околу храмот. По преосветувањето, веднаш беше отслужена и света архиерејска Литургија, а Митрополитот Тимотеј се обрати кон верниот народ со пригодна беседа, која ви ја пренесуваме во целост.
affiliate link trace | Nike Dunk - Collection - Sb-roscoff
Митрополит Тимотеј
Во името на Отецот и Синот и Светиот Дух.
Драги браќа и сестри,
Прародителскиот грев на Адам и Ева делувал разорно на целокупната човечка природа, како на духовна, така и на телесна. Човек со чист и бистар ум, со возвишени чувства на добро и радост за своето постоење со постојана волја и со непоматена совест и здраво тело, потполно се изменил и на духовен и на телесен план. На човекот му се заматил умот, му се помрачиле чувствата, ослабела волјата, му се поматила совеста и му ослабело телото. Човекот целосно се изменил. Господарот на природата постанал нејзин роб. Слугата Божји станал слуга на демонот. Гревот ја уништил сликата Божја во човекот и човекот по душа сличен на Бога почнал сѐ повеќе да личи на ѓаволот и станал отпадник од Бога. Станал причина за злото и за смртта. Огревовениот човек станал склон на болести и телесни и духовни слабости, а на крај подлегнал и на смртта како неминовна последица од гревот. Затоа бил истеран од Рајот и фрлен на земјата, која поради него почнала да раѓа коров и трње.
Овој неизмерен и голем пад на нашите прародители се пренел на целиот човечки род. Со одминувањето на времето, човештвото стенкало во грев и не можело само да се избави од таа состојба, како духовна, така и телесна. Затоа било потребно милоста Божја и Неговото човекољубие, кога се исполнило времето да се излее во лицето на нашиот Господ Исус Христос. Господ Исус Христос доаѓа од небесните височини и живее во овој свет во сѐ сличен на нас освен во гревот. Он ќе претрпи маки и распнувања, како и погребение, како искупителна жртва за сите нас. Но, да не се разбере дека човечкото спасение е исклучиво Божјо дело како Негово човекољубие. Тоа ни е дадено преку Господа Исуса Христа како задача, а не како завршен факт. Затоа Господ Христос ја основа светата Црква и во неа воведува свети тајни и ги избира дванаесетте апостоли да го проповедаат Евангелието. Така, оној кој ќе го прифати ова по своја волја ќе се спаси од грев, зло и вечна смрт.
Денеска светото Евангелие ни зборува како Христос ги избрал своите ученици и апостоли. Тој избрал прости рибари: најпрво Андреј Првоповикан и брат му Симон Петар, а потоа и Заведеевите синови Јаков и Јован. (Мт. 4, 18-22) Христос им вели: „врвете по Мене и јас ќе ве направам ловци на луѓе" Апостолите веднаш оставиле сѐ и пошле по Христа. Апостолите го почувствувале Божествениот глас во Исусовиот повик и Го препознале долгоочекуваниот Месија на човечкиот род. Затоа тие не размислувале и веднаш оставиле сѐ и со одушевеност заминале по Христа.
Овој повик се однесува на сите нас, а не само на апостолите. Овој повик: „Ајде по Mене" – се однесува за сите времиња од Господа, преку нас и се додека постои векот и човечкиот род. Христос постојано не повикува да одиме по Него, но никого не принудува. Исто како што човек со својата слободна волја отпаднал од Бога правејќи грев, унаказувајќи ја својата и материјална и духовна природа, исто така, со своја слободна волја треба да се врати кај Бога. Отфрлајќи го гревот, со самото тоа преку Црквата и светите тајни треба да си го врати првобитниот образ на својата природа. Затоа Господ вели: „Ете, стојам пред вратата и чукам. Ако некој го чуе гласот Мој и ја отвори вратата, ќе влезам при него и ќе вечерам со него, и тој со Мене". (Откр. 3, 20) Оние кои ќе го чујат повикот Христов и ќе го примат, односно ќе се крстат во името на Отецот и Синот и Светиот Дух, го добиваат печатот од дарот на Светиот Дух. Го исполнуваат заветот на живиот Бог и ќе ја накитат својата душа со христијански добродетели и така ќе се спасат.
Па и ние, кои се наоѓаме во овој свет храм посветен на светиот великомаченик Георгиј, чиј престол денес беше преосветен, да го слушнеме Господовиот повик: „Ајде по Mене!", бидејќи Он е благ и долготрпелив, многумилостив и човекољубив, и сака сите да се спасиме.
Ја користам оваа прилика на парохискиот свештеник о. Александар Димоски, како и на црковниот одбор при храмот „Свети Георгиј Победоносец" да им искажам благодарност за нивниот труд и ангажман и за грижата овој храм Божји да биде вака убаво уреден. Свети великомаченик Георгиј да биде молитвеник пред Бога за зачувување на верата и одење по Христовиот пат кон вечен и блажен живот, сега и во сета вечност. Амин.
Втора недела по Педесетница
Преосветување на престол во храм
„Свети Георгиј Победоносец" с. Врбјани
30.06.2019 год.