НАЈНОВО ОД ДЕБАРСКО-КИЧЕВСКАТА ЕПАРХИЈА

„Сега тајно ќе се исполни пророчкото претскажување: И ти Витлееме, земјо Јудина, никако нема да се наречеш помал од војводствата (Јудини), подготвувајќи ја пештерата; оти од тебе ќе излезе Водач на народите, во тело, од Дева Отроковица, Христос Бог, Кој ќе го пасе Својот народ - новиот Израил! Сите заедно, да го прославиме Неговото величие“ (тропар на Прв час на Претпразнество на Божик). 

На 06.01.2016 година, на Претпразненството на Христовото Рождество - Бадник, во храмот „Св. Петар и Павле“ во Кичево, беше отслужена свечена Вечерна богослужба, на која чиноначалствуваше Неговото Високопреосвештенство Митрополитот Дебарско-кичевски г. Тимотеј, во сослужение на протоереите Никола Христоски и Стевчо Тошевски, свештениците Ристо Камбуроски, Александар Матески, Ѓорѓи Блажевски и Александар Крстаноски и протоѓаконот Николче Ѓурѓиноски. По завршувањето на Вечерната богослужба, Митрополитот Тимотеј го освети бадниковото гранче и се обрати кон многубројниот верен народ со пригодна беседа, која подолу во целост ви ја пренесуваме. Пред доаѓањето во градскиот храм во Кичево, Митрополитот Тимотеј го посети и манастирот „Пресвета Богородица - Пречиста“ во Кичево, каде што го освети бадниковото гранче и го навести доаѓањето на Овоплотениот Бог. Во продолжение ви ја пренесуваме беседата на Митрополитот Тимотеј.

На 03.01.2016 година, во манастирот „Св. вмч. Ѓорѓи“ во с. Кнежино, Кичево, се упокои во Господа монахињата Доротеја, која последните десет години од својот овоземен живот целосно ги посвети на Бога, подвизувајќи се и градејќи го манастирот „Св. вмч. Ѓорѓи“ во Кнежино, Кичево. Монахињата Доротеја е родена во 1954 година во кичевското село Цер, а својот работен век го поминува во Охрид, каде што и се пензионира. Поминувајќи одреден период на искушеништво во повеќе наши манастири, таа ќе остане во манастирот во Кнежино, за кој и непрестајно се грижеше последните години од својот живот. Изминатата година, монахињата Доротеја се бореше со тешка и неизлечлива болсет, подготвувајќи се за средба со Севишниот Бог. Монахињата Доротеја беше погребана на 05.01.2016 година, во гореспомнатиот манастир. Опелото на монахињата Доротеја го изврши Неговото Високопреосвештенство Митрополитот Дебарско-кичевски г. Тимотеј, заедно со повеќе свештенослужители. Митрополитот Тимотеј на крајот се обрати кон присутните роднини, пријатели и верници на упокоената со пригодно слово, кое во целост ви го пренесуваме.

„Преподобен отче, ти не си им дал сон на очите твои, ниту дремка на веѓите твои, додека душата и телото не си ги ослободил од страстите и за живеалиште на Духот не си се подготвил себе, бидејќи, откако Христос, со Отецот, си изгради дом во тебе, те направи и живеалиште на Едносушната Троица. И сега, Науме блажени, моли се да се спасат душите наши“ (Литиска стихира на Слава... на Вечерна на преп. Наум Охридски Чудотворец). 

Празнувањето на преподобниот Наум Охридскиот Чудотворец, таткото на монасите, започна на 04.01.2016 година со свечена Вечерна богослужба во манастирот на Белото Езеро, којшто самиот го изгради и во кој со пост и молитва секојдневно ги победуваше страстите и искушенијата. На Вечерната богослужба чиноначалствуваше Неговото Високопреосвештенство Митрополитот Дебарско-кичевски г. тимотеј, во сослужение на архимандритот Нектариј, игумен на Светинаумовата обител, протоерејот Никола Христоски, свештеникот Роберт Илијевски, протоѓаконот Николче Ѓурѓиноски и ѓаконот Сашо Целески. 

Прославата на великиот Црноризец продолжи утредента на 05 јануари, со света Архиерејска Литургија, на која чиноначалствуваше Митрополитот Тимотеј, во сослужение на архимандритот Нектариј, протоерејот Никола Христоски, свештениците Атанас Казанџиски, Димче Азески, Владо Недески и Роберт Илијевки, протоѓаконот Николче Ѓурѓиноски и ѓаконот Сашо Целески. По завршувањето на Литургијата, беше извршен чинот на Мал водосвет и беше прекршен празничниот колач, а Митрополитот Тимотеј се обрати кон многубројниот верен народ со пригодна беседа, која интегрално ви ја пренесуваме.

На 20.12.2015 година, во Дваесет и деветтата недела по Педесетница и на празникот на светиот Амвросиј Милански и на светиот Григориј Григоријатски, Неговото Високопреосвештенство Митрополитот Дебарско-кичевски г. Тимотеј, во сослужение на протоереите Никола Христоски и Димче Ѓорѓиески и свештениците Зоран Попоски, Љупчо Симиџиески и Ромео Петрески, го освети и го положи камен-темелникот за изградба на нов храм, посветен на светиот Николај Мирликиски Чудотворец, во населбата Чекоштина во Охрид. Храмот ќе се гради по иницијатива и со донациите на г-дин Цветко Грозданов од Охрид, како и со донациите на сите добронамерни верници од пошироката околина. Митрополитот Тимотеј ги поздрави присутните со пригодно слово, а на градителите им посака што побрзо да го подигнат Божјиот дом, а Господ стоструко да им врати за нивниот труд. 

„Радувај се, свештени уме, чисто живеалиште на Света Троица, црковен столбу, тврдино на верните, помош на поразените, ѕвездо која со твоите од Бога примени молитви постојано ги разоруваш опасностите и мракот на болките, светителу Николае; тивко пристаниште во кое се спасуваат оние што ги носи животната бура: Моли Го Христа, да им даде на душите наши милост голема“ (стиховна стихира на Вечерна на свети Николај Мирликиски).

На 19.12.2015 година, денот кога го прославуваме споменот на светиот Николај Мирликиски Чудотворец, великиот ревнител за вистинската вера, во храмот „Св. Никола Геракомија“ во Охрид, беше отслужена света архиерејска Литургија, на која чиноначалствуваше Неговото Високопреосвештенство Митрополитот Дебарско-кичевски г. Тимотеј, во сослужение на протоерејот Никола Христоски, свештеникот Љупчо Симиџиески, еромонасите Доситеј и Макариј, протоѓаконот Николче Ѓурѓиноски и ѓаконот Сашо Целески. Пред многубројниот верен народ, кој речеиси без исклучок пристапи кон светиот Путир, Митрополитот Тимотеј се обрати со пригодна беседа, која во целост ви ја пренесуваме. По завршувањето на Литургијата, Митрополитот Тимотеј им подели нафора на верните чеда.