Без епископот, како претстојател на Евхаристијата, не можеме да зборуваме ниту за Црква, ниту за спасение во Христа. Зашто, како што Христос се огледа во Отецот, така исто и епископот, кој е икона Христова, може да каже дека извршува Христово дело, ако биде во целост огледало или икона Христова (свети Атанасиј Велики)
Божествената Литургија е центар на животот на Црквата, и таа, всушност, е нејзиното битие. Токму затоа и претстојателот на светата Евхаристија го има централното место во Црквата, како икона Христова, како икона на Првосвештеникот, Кој принесува и се принесува. Од овие причини и секој избор на епископ во Црквата Христова е радосен чин сам по себе, а радоста станува уште поголема кај свештенството, монаштвото и верниот народ, кои во ликот на Епископот добиваат свој духовен водач, свој пастир, кој треба да го одбрани своето паство од духовните непријатели. По упокојувањето на Митрополитот Дебарско-кичевски г. Тимотеј, Светиот архиерејски синод на Македонската православна црква - Охридска архиепископија, со сета своја мудрост и далекогледост, едногласно го избра архимандритот Георгиј (Ѓорѓевски) за нов митрополит на Дебарско-кичевската епархија. Според одлуката на САС на МПЦ-ОА, наречението на новоизбраниот Митрополит Георгиј се изврши на 12 јули 2025 година, на Петровден, во храмот „Св. Климент Охридски и Св. Пантелејмон“ на Плаошник, а епископската хиротонија и интронизацијата за Митрополит Дебарско-кичевски се изврши на 13 јули 2025 година, на Павловден, во Соборниот храм на Охридските архиепископи „Св. Софија“ во Охрид.
Изборот на новиот Митрополит Дебарско-кичевски г. Георгиј започна на 12 јули 2025 година, со свечена Вечерна богослужба, во ман. „Св. Климент и Пантелејмон“ на Плаошник во Охрид. Пред почетокот на Вечерната богослужба, беше извршен чинот на т.н. Наречение, на кое чиноначалствуваше Неговото Блаженство Митрополитот Скопски и Архиепископ Охридски и Македонски и на Јустинијана Прима г.г. Стефан, во сослужение на Митрополитите Петар, Јован, Пимен, Иларион, Јосиф и Григориј и Епископот Марко, архимандритите Нектариј, Агатон и Иринеј, еромонахот Никодим, протоѓаконите Николче Ѓурѓиноски, Александар Димитријов и Драган Иванов и ѓаконот Стефан Гоговски.
Прославата и торжествата продолжија утредента на 13.07.2025 година, во соборниот храм „Св. Софија” во Охрид, каде што беше отслужена света архиерејска Литургија, на која чиноначалствуваше Архиепископот г.г. Стефан, во сослужение на Митрополитите Петар, Наум, Јован, Пимен, Иларион, Јосиф, Григориј и епископите Марко и Јоаким, архимандритите Георгиј, Нектариј, Агатон и Фотиј, протоереј-ставрофорите Никола Грамбозов, Синиша Ристовски, ЈОван Миловановиќ (од СПЦ), Трајче Петковски, Јован Кумевски, Никола Христоски и Игор Никовски, игуменот Исак, протоереите Зоран Грозданов, Сашо Додевски, Васко Голабоски, Жарко Мицковски, Зоран Копчаревски, Игор Јовановиќ и Тони Кузмановски, еромонахот Нектариј, свештениците Александар Матески, Владо Недески, Климент Станковски и Сашо Целески, протоѓаконите Николче Ѓурѓиноски, Александар Димитријов и Драган Иванов и ѓаконите Стефан Гоговски и Марко Мантов. Пред почетокот на Литургијата, новоизбраниот Митрополит Дебарско-кичевски г. Георгиј ги прочита трите слова со кои ја потврди својата увереност во вистинската вера, предадена од апостолите и светите отци. Потоа, на соодветното место од Литургијата, беше хиротонисан новоизбраниот Митрополит, а по завршувањето на Литургијата, Архиепископот Охридски и Македонски г.г. Стефан се обрати кон новоракоположениот Епископ со пригодна беседа и му го врачи епископскиот жезол, симболот на епископската власт, но и на епископското служење. Откако го прими жезолот, Митрополитот Георгиј, од архиерејскиот трон на царската „Св. Софија”, ја искажа својата пристапна беседа.
На овој свечен чин за нашата света Црква и за нашата Епархија, присуствуваа многубројни гости, претставници на Владата на РСМ, на локалната самоуправа, на Римокатоличката црква, на Исламската верска заедница, на политичките партии, на Универзитетите и други многубројни гости. Меѓу присутните беа: Премиерто на РСМ г-дин Христијан Мицковски, Вицепремиерот за економски прашања, г-дин Љупчо Димовски, Минстерот за внатрешни работ на РСМ, г-дин Панче Тошковски, Министерот за транспорт и врски, г-дин Александар Николоски, Претседателот на СДСМ, г-дин Венко Филипче, Бискупот Скопски г. Киро Стојанов, претседателот на Комисијата за односи со верските заедници и религиозни групи г-ѓа Оливера Трајковска, градоначалникот на општина Охрид г-дин Кирил Пецаков, како и многу други уважени гости. На светата Литургија молитвено присуствуваа и Епископите Климент, Давид, Јаков, Партениј и Никола.
Од името на свештенството, монаштвото и сиот верен народ од нашата Епархија, му го честитаме чинот и изборот на Митрополитот Дебарско-кичевски г. Георгиј, со желби и молитви долги години да Му служи на Првосвештеникот и Архиереј Христос, на нашата света Македонска православна црква - Охридска архиепископија и на светата Дебарско-кичевска епархија. Семудриот Господ да му дава мудрост, и со голема љубов да го води повереното стадо на Христовиот пат, та сите заедно како Црква да застанеме од десната страна на Бога Отецот. На многаја лета, Високопреосвештен Владико!
