НАЈНОВО ОД ДЕБАРСКО-КИЧЕВСКАТА ЕПАРХИЈА

По повод празникот на свети архангел Михаил и на останатите бестелесни, небесни, ангелски сили во манастирот "Свети Наум Охридски" се служеше света архиерејска Литургија, бидејќи црквата што ја изградил преподобниот охридски чудотворец, свети Наум, им ја посветил ним. На Литургијата чиноначалствуваше Неговото Високопреосвештенство, Митрополитот Дебарско-кичевски, г.Тимотеј во сослужение на архимандрит Нектариј, игумен на манастирот, протојереј-ставрофор Тоди Јован, свештеник од Подградец, Р. Албанија, свештеник Никола Христоски, свештенослужител во манастирот "Свети Климент и свети Пантелејмон" – Плаошник и ѓакон Димче Азески, референт при Дебарско-кичевската епархија.

На празникот на светите бесребреници Козмо и Дамјан, во истоимената црква во Варош − Охрид, се служеше света архиерејска Литургија на која чиноначалствуваше Неговото Високопреосвештенство, Митрополитот Дебарско-кичевски г. Тимотеј во сослужение на свештеник Љупчо Симиџиоски, парох при црквата "Света Богородица - Каменско", Охрид, свештеник Димче Ѓорѓиески, парох Варошки, свештеник Никола Христоски, редовен свештенослужител во манастирот "Свети Климент и Пантелејмон" - Плаошник, свештеник Саше Костадиноски, новоракоположен свештеник кој е на пракса во црквата "Света Богородица – Каменско" и ѓакон Димче Азески, референт при Дебарско-кичевската епархија.

Денот кога Православната црква го празнува споменот на светиот маченик Нестор, Митрополитот Дебарско-кичевски г.Тимотеј во сослужение на архимандритот Нектариј, игумен на манастирот "Свети Наум Охридски", свештеникот Игор Никовски, секретар на Дебарско-кичевската епархија, свештеникот Сашо Ристески, парох на деветтата охридска парохија, и ѓаконите Димче Азески и Николче Ѓурѓиноски, референти при Дебарско-кичевската епархија, служеше света божествена Литургија во црквата "Свети Никола" - Долна Маала во Охрид. На светата Литургија во ѓаконски чин беше ракоположен магистерот по теолошки науки Владо Недески од Охрид, за кого молиме Бог да му дарува духовни сили достојно да Му служи Нему и на Неговата Црква, за радост на ангелите и за пораз на демоните.

Празникот на светиот великомаченик Димитриј Мироточив, чудотворецот солунски, во Дебарско-кичевската епархија свечено беше одбележан со света архиерејска Литургија во црквата "Света Богородица – Каменско" - Охрид, на која чиноначалствуваше Неговото Високопреосвештенство, Митрополитот Дебарско-кичевски г.Тимотеј во сослужение на повеќемина свештенослужители од епархијата.

На 06.11.2008 г. во резиденцијата на Митрополитот Дебарско-кичевски г. Тимотеј се одржа работен состанок на Одборот за возобновување на светиклиментовиот Универзитет во Охрид. Во одборот зедоа учество академик Крум Томовски, академик Петар Хр. Илиевски, Архиепископ Охридски и Македонски г.г. Стефан, проф. д-р Вера Битракова – Грозданова, Митрополит г. Тимотеј, д-р Лазар Шуманов и г. Паско Кузман, директор на Дирекцијата за заштита на културни споменици од Скопје. Одборот ги разгледа програмските задачи што треба да се гради на археолошкиот локалитет на Плаошник. По опстојно разгледување и сериозни анализи со мали измени и дополнувања беше прифатен и усвоен предлогот на работниот одбор за ревитализација на светиклиментовиот Универзитет на Плаошник. По завршувањето на состанокот, членовите на одборот направија посета на самото место на локалитетот.