НАЈНОВО ОД ДЕБАРСКО-КИЧЕВСКАТА ЕПАРХИЈА

„Големиот војвода на бесплотните ангели, кога се појави во градот Назарет, ти Го навестува, Пречиста, Царот на вековите и Господа, велејќи ти: Радувај се, благословена Марие, чудо недостижно и неискажливо - обновување на луѓето!“ (седален на Утрена на празникот Благовештение на Пресвета Богородица).

На 07.04.2025 година, денот кога го прославуваме празникот којшто го навестува спасението на човечкиот род - зачнувањето од Светиот Дух на нашиот Спасител Господ Исус Христос, на празникот Благовештение на Пресвета Богородица, којшто е и празник на нашата света Охридска архиепископија, во катедралниот храм „Св. Софија“ во Охрид, беше отслужена света архиерејска Литургија, на којашто чиноначалствуваше Неговото Блаженство Митрополитот Скопски и Архиепископ Охридски и Македонски и на Јустинијана Прима и Администратор Дебарско-кичевски г. г. Стефан, во сослужение на Митрополитот на Михаловце и Кошице г. Георгиј од Црквата на Чешка и Словачка, Митрополитот Брегалнички г. Иларион, архимандритот Нектариј, протоереј-ставрофорите Никола Христоски, Сашо Богданоски и Димче Ѓорѓиески, игуменот Агатон, протоерејот Горан Ставрески, свештениците Димче Азески и Оливер Димитров, еромонахот Никодим, протоѓаконите Николче Ѓурѓиноски, Александар Димитријов, Драган Иванов и протоѓаконот Марош од Црквата на Чешка и Словачка. Архиепископот Стефан го произведе во чин чтец дипломираниот теолог Гоце Ристески од Охрид. По завршувањето на Литургијата, Архиепископот Стефан се обрати кон верниот народ со пригодна беседа, во која го истакна значењето на овој велелепен празник за човековиот род, а, истовремено, се заблагодари и на Митрополитот Георгиј, кој дојде да сослужува со нас на овој голем ден за Црквата Христова и за нашата света Македонска православна црква - Охридска архиепископија. Архиепископот Стефан му подари на Митрополитот Георгиј и прекрасна панагија со претстава на охридското Благовештение, празникот на нашата Охридска архиепископија, на што Митрополитот Георгиј возврати со зборови на благодарност за подарокот и за можноста да сослужува во велелепниот храм на Премудроста Божја. По завршувањето на Литургијата, Митрополитот Георгиј го посети манастирот „Св. Климент и Пантелејмон“ на Плаошник во Охрид, каде што отслужи краток парастос на гробот на блаженоупокоениот Митрополит Тимотеј.  

Возљубени верни чеда на Дебарско-кичевската епархија, во продолжение ви ја пренесуваме беседата изговорена од Неговото Блаженство Архиепископот Охридски и Македонски г.г. Стефан, изговорена на празникот Богојавление на водите на реката Црн Дрим во Струга.

Возљубени верни чеда на Дебарско-кичевската епархија, во продолжение ви ја пренесуваме беседата изговорена од Неговото Блаженство Архиепископот Охридски и Македонски г.г. Стефан, изговорена на празникот Богојавление на водите на Охридското Езеро во Охрид.

„Кога со Твоето јавување ја просветли вселената, тогаш побегна соленото море на неверувањето, и Јордан што течеше надолу се врати назад, нас издигнувајќи не кон небесата. Но со височината на Твоите божествени заповеди сочувај не, Христе Боже, по молитвите на Богородица, и помилуј не“ (ипакој на Утрена на празникот Свето Богојавление на Господ Бог и Спасител наш Исус Христос). 

На 19.01.2025 година, денот кога го прославуваме празникот Свето Богојавление на Господ Бог и Спасител наш Исус Христос, во храмот „Успение на Пресвета Богородица“ - Каменско во Охрид, беше отслужена света архиерејска Литургија, на којашто чиноначалствуваше Неговото Блаженство Митрополитот Скопски и Администратор Дебарско-кичевски и Австралиско-сиднејски и Архиепископ Охридски и Македонски и на Јустинијана Прва г.г. Стефан, во сослужение на протоереј-ставрофорите Никола Христоски и Ристе Ристевски, игуменот Агатон, свештениците Димче Азески и Ѓорѓи Блажевски, еромонахот Никодим и протоѓаконите Николче Ѓурѓиноски, Александар Димитријов и Драган Иванов. По завршувањето на Литургијата, беше извршен чинот на Голем Богојавленски водосвет, а Архиепископот Стефан се обрати со пригодна беседа, којашто подолу во целост ви ја пренесуваме.  

„Денес, кога се роди Христос, небото и земјата се соединија; денес Бог дојде на земјата, а човекот се искачи на небото; денес, невидливиот по природа, заради човекот станува видлив по тело. Затоа и ние, славејќи да Му запееме: Слава на Бога во висините, а на земјата мир, што го дарува Твоето пришествие, Спасителу наш, слава Ти“ (литиска стихира на Вечерна на Рождество Христово - Божик).

Денеска кога небото и земјата се веселат со пророците и со ангелите, кога Невидливиот по природа стана видлив по тело за нас грешните и недостојни слуги, кога се исполнија сите пророчки претскажувања, и Сонцето на правдата дојде на земјата и ја обожи природата на земнородните, сите да запееме и да Го восфалиме Бога за Неговата милост и љубов, искажувана од почетокот на светот и во вечни векови. На овој светол и торжествен ден, на празникот на Рождеството Христово - Божик, во храмот „Св. вмч. Ѓорѓи“ во Охрид, беше отслужена света архиерејска Литургија, на која според благословот на Неговото Блаженство Митрополитот Скопски и Администратор Дебарско-кичевски и Австралиско-сиднејски и Архиепископ Охридски и Македонски и на Јустинијана Прва г.г. Стефан, чиноначалствуваше Неговото Преосвештенство Епископот Велички г. Никола, во сослужение на протоереј-ставрофорите Никола Христоски и Кирил Јованоски, протоерејот Горан Ставрески и протоѓаконот Николче Ѓурѓиноски. По завршувањето на Литургијата, беше прочитано и Божикното послание, испратено од Архиепископот Стефан и членовите на САС на МПЦ-ОА. Истото Ви го пренесуваме во целост. Во вечерните часови, пак, во Административниот центар на Дебарско-кичевската епархија во Охрид, беше организирана заедничка вечера со свештениците од Епархијата, а на најмладите дечиња, според долгогодишната традиција, им беа поделени Божикни пакетчиња.