НАЈНОВО ОД ДЕБАРСКО-КИЧЕВСКАТА ЕПАРХИЈА

„Пред Твоето распнување на крст, Господи, ги зеде Твоите ученици на Гора висока и пред нив се преобрази, озарувајќи ги со светлината на Твојата сила, со Твојата власт и човекољубие, сакајќи да им ја покажеш светлината на воскресението. За него удостој нѐ и нас во мир, Боже, како милостив и Човекољубец“ (стихира на Господи повикав... на Вечерна на Преображение на Господ Исус Христос).

Празнувањето на светлиот празник на Преображението Христово, според црковниот типик, започна со свечена Вечерна богослужба, во манастирот „Св. вмч. Ѓорѓи“ во Кнежино, Кичево, на која чиноначалствуваше Неговото Високопреосвештенство Митрополитот Дебарско-кичевски и Администратор Австралиско-сиднејски г. Тимотеј, во сослужение на архимандритот Партениј, протоереј-ставрофор Никола Христоски, протоерејот Стевчо Тошевски, свештеникот Александар Матески, еромонасите Ефросиниј и Кирил и протоѓаконот Николче Ѓурѓиноски. Овој ден ќе остане запишан во историјата на манастирот како радосен ден, во кој нашата света Црква доби уште еден ангел на земјата, уште еден борец против оние кои попусто непријателствуваат против нас. Имено, искушеничката Драгица беше потстрижена во монашки чин од раката на нашиот Митрополит Тимотеј, а како залог за „новиот живот“ го доби името Софија. Од името на Митрополитот, како и од името на целата епархија, ѝ го честитаме монашкиот постриг на монахињата Софија, а нејзиниот подвиг да биде за радост на ангелите и за пораз на демоните. По завршувањето на Вечерната богослужба, Митрополитот Тимотеј се обрати кон многубројниот верен народ со пригодна беседа, која во целост ви ја пренесуваме.

„Чудесниот Климент - великата труба на вистината, ги повикува денес сите празникољупци на веселба. Сите верни светло да го пречекаме торжеството, со песни славејќи го добриот пастир за неговите свештени подвизи, та преку неговите молитви да примиме од Христа голема милоста“ (литијна стихира на св. Климент Охридски).

Прославата на великиот светител Климент Охридскиот Чудотворец, нашиот просветител и учител, како и на светите Седмочисленици и на св. великомаченик Пентелејмон, започна на 08 август, во вечерните часови, со свечена Вечерна богослужба, во манастирот „Св. Климент и Пантелејмон“ на Плаошник во Охрид, на која чиноначалствуваше Неговото Високопрепсвештенство Митрополитот Дебарско-кичевски и Администратор Австралиско-сиднејски г. Тимотеј, во сослужение на протоереј-ставрофор Димче Ѓорѓиески, протоерејот Никола Христоски, свештениците Кирил Јованоски, Горан Ставрески, Владо Недески и Роберт Илијевски, протоѓаконот Николче Ѓурѓиноски и ѓаконот Сашо Целески. По Вечерната, беше отслужен и Акатист на светиот Климент Охридски.

„Тебе, отроковице, огнот никако не те изгоре, но ги изгоре беззакониците, а Христос тебе те запази неповредена, како што во она време, со моќната рака, ги спаси младите момчиња кои пееја“ (песна од Канонот на Утрена на преподобномаченица Параскева).

На 08.08.2017 година, на денот кога го прославуваме споменот на светата преподобномаченица Параскева и на всетиот свештеномаченик Ермолај, во храмот „Св. Петка“ во ман. „Св. Наум Охридски“ во Охрид, беше отслужена света архиерејска Литургија, на која чиноначалствуваше Неговото Високопреосвештенство Митрополитот Дебарско-кичевски и Администратор Австралиско-сиднејски г. Тимотеј, во сослужение на архимандритот Нектариј, игумен на манастирот, свештеникот Роберт Илијевски и протоѓаконот Николче Ѓурѓиноски. По завршувањето на Литургијата, беше извршен чинот на Мал водосвет и беше прекршен празничниот колач, а Митрополитот Тимотеј се обрати кон верниот народ со пригодна беседа, која ви ја пренесуваме во целост.

„Во Света Троица верата, сепреподобни, пред безбожните тирани исповедајќи ја, тројцата како жртва на Бога се принесовте, и насладувајќи се во радост од вистинскиот живот, поткрепете ги со свети молитви оние, кои сепрославениот ваш спомен непрестајно го празнуваат“ (седален на Утрена на светите пречистански преподобномаченици).

Споменот на великиот верски и национален празник на светиот пророк Илија и на светите пречистански преподобномаченици Евнувиј, Пајсиј и Аверкиј, започна да се празнува ден порано со свечена Вечерна богослужба, во манстирот „Пресвета Богородица - Пречиста“ во Кичево, на која чиноначалствуваше Неговото Високопреосвештенство Митрополитот Дебарско-кичевски и Администратор Австралиско-сиднејски г. Тимотеј, во сослужение на протоереите Никола Христоски и Стевчо Тошевски, еромонахот Макариј, свештениците Владо Недески и Александар Матески и ѓаконот Сашо Целески.

„На небесата гледајќи ја Божјата слава, а на земјата давајќи благодат од висините, началнику на ангелите, мудри Гаврииле, на Божјата слава служителу, и на светот божествен бранителу, спасувај и чувај ги оние што ти викаат: Самиот ти биди ни помошник, и никој ништо не ни може“ (кондак на празникот Собор на св. Архангел Гаврил).

На 26.07.2017 година, на празникот Собор на св. Ахангел Гаврил и на преп. Сара Египетска, беше осветен храмот „Св. Архангел Гаврил“ во с. Модрич, Струга, а веднаш потоа се отслужи и света архиерејска Литургија, на која чиноначалствуваше Неговото Високопреосвештенство Митрополитот Дебарско-кичевски и Администратор Австралиско-сиднејски г. Тимотеј, во сослужение на архимандритот Нектариј, протоереите Никола Христоски и Васко Голабоски, протоѓаконот Николче Ѓурѓиноски и ѓаконот Христијан Костоски. По завршувањето на Литургијата беше прекршен празничниот колач, а Митрополитот Тимотеј се обрати кон верниот народ со пригодна беседа, која интегрално ви ја пренесуваме.