НАЈНОВО ОД ДЕБАРСКО-КИЧЕВСКАТА ЕПАРХИЈА

На 19 и 20 февруари 2016 година, во манастирот „Св. Јован Крстител - Бигорски“, а по повод именденот на игуменот на манастирот, архимандритот Партениј, беше свечено прославен споменот на светиот Партениј Лампсакиски. Празнувањето започна со свечена Вечерна богослужба, на која чиноначалствуваше Неговото Високопреосвештенство Митрополитот Дебарско-кичевски г. Тимотеј, во сослужение на архимандритот Партениј, протоерејот Веле Спиркоски, еромонасите Доситеј, Макариј и Кирил, свештениците Дејан Секулоски, Димче Азески, Васко Голабоски и Бобан Митевски, протоѓаконот Николче Ѓурѓиноски и ероѓаконите Порфириј и Силуан. По завршувањето на Вечерната богослужба, архимандритот Партениј се обрати кон верниците со пригодно слово.  

Прославата продолжи утредента со света архиерејска Литургија, на која чиноначалствуваше Митрополитот Тимотеј, во сослужение на архимандритот Партениј, еромонасите Доситеј, Макариј и Кирил, свештеникот Миле Ангеловски, протоѓаконот Николче Ѓурѓиноски и ероѓаконот Порфириј. По завршувањето на Литургијата, беше осветено празничното коливо, а се отслужи и панихида по повод 140 години од упокојувањето на преподобниот Партениј Зографски. Митрополитот Тимотеј се обрати кон верните со пригодна беседа, која интегрално ви ја пренесуваме.

„На земјата си се подвизавал борејќи се со непријателите, кои те принудуваа на измама и богоборна лага; а на небесата, Трифуне, се насладуваш носејќи венец, и ликуваш со ангелите пеејќи: Свештеници, запејте! Луѓе, превозносете Го Господа во вековите“ (песна од Канонот на Утрена на св. маченик Трифун).

На 14.02.2016 година, на денот кога го празнуваме Претпразненството на Сретение, како и споменот на светиот маченик Трифун, со благослов и покана на Митрополитот Повардарски г. Агатангел, беше отслужена света архиерејска Литургија во храмот „Св. вмч. Димитриј“ во Кавадарци, на која чиноначалствуваше Неговото Високопреосвештенство Митрополитот Дебарско-кичевски г. Тимотеј, во сослужение на протоерите Киро Ристов, Никола Христоски, Воислав Ѓорѓиев и Мартин Деневски, протоѓаконите Влатко Стојменов, Николче Ѓурѓиноски и Васил Ристовски. По завршувањето на Литургијата, беше извршен чинот на Мал водосвет, а потоа, според традицијата, беше закроено и лозјето. Митрополитот Тимотеј се обрати кон верниците со пригодна беседа, која во целост ви ја пренесуваме. 

На 13.02.2016 година, во просториите на Митрополитската резиденција на Плаошник во Охрид, беше одржан редовниот состанок на Епархискиот управен одбор на Дебарско-кичевската епархија. На состанокот беше усвоена Завршната сметка на Епархијата за 2015 година, а беше прифатен и Предлог буџетот на Епархијата за 2016 година. Освен овие тековни прашања, на состанокот беа разгледани и повеќе пристигнати акти и писма, а се расправаше и за повеќе проблеми и прашања од секојдневниот живот на Дебраско-кичевската епархија.

На 11.02.2016 година, во манастирот „Св. вмч. Ѓорѓи“ во с. Кнежино, Кичево, а по повод четириесетдневниот помен за монахињата Доротеја, беше отслужена света архиерејска Литургија, на која чиноначалствуваше Неговото Високопреосвештенство Митрополитот Дебарско-кичевски г. Тимотеј, во сослужение на протоереите Никола Христоски и Стевчо Тошевски, еромонахот Ефросиниј, свештеникот Александар Матески и ѓаконот Сашо Целески. Пред започнувањето на Литургијата, беше извршен чинот на Мал водосвет и беше осветен новиот фрескоживопис во манастирската црква. По завршувањето на Литургијата, беше отслужен парастос по повод четириесет дена од упокојувањето на монахињата Доротеја, а Митрополитот Тимотеј се обрати кон присутните верници со пригодна беседа, која ви ја пренесуваме во целост. 

„Богато се излеа благодат во твојата уста, Блажени, и реки од догми излеа, кои ја напоија Црквата Христова, многуроден плод принесоа, Тимотее Христопроповеднику, богомудар апостоле“ (песна од Канонот на Утрена на свети апостол Тимотеј).

На 04.02.2016 година, денот кога го прославуваме споменот на светиот апостол Тимотеј и на преп. маченик Анастасиј Персиец, како и по повод именденот на Неговото Високопреосвештенство Митрополитот Дебарско-кичевски г. Тимотеј, во манастирот „Св. Климент и Пантелејмон“ на Плаошник во Охрид, беше отслужена света архиерејска Литургија, на која чиноначалствуваше Митрополитот Дебарско-кичевски г. Тимотеј, во сослужение на Митрополитот Струмички г. Наум, Митрополитот Европски г. Пимен, Митрополитот Брегалнички г. Иларион, Митрополитот Тетовско-гостиварски г. Јосиф и Митрополитот Кумановско-осоговски г. Јосиф, архимандритот Нектариј, игумените Гаврил и Григориј, протоереите Никола Христоски и Димче Ѓорѓиески, свештеникот Љупчо Бакрачески, протоѓаконите Сашо Ристов и Николче Ѓурѓиноски и ѓаконот Сашо Целески. По завршувањето на Литургијата, беше прекршен празничниот колач, а Митрополитот Кумановско-осоговски г. Јосиф се обрати пред верниот народ со пригодна беседа, која подолу во целост ви ја пренесуваме. Митрополитот Тетовско-гостиварски г. Јосиф ги причести оние кои со страв и побожност пристапија кон светиот Путир, а Митрополитот Тимотеј им подели нафора на верниците.

Од името на свештенството и монаштвото, како и од сите верни чеда од нашата Епархија, му го честитаме именденот на нашиот духовен водач Митрополитот Тимотеј, со желби и молитви кон Господа, Он да го чува на сите патишта негови, та уште долги години да Му служи на Севишниот, а нас да нè води на вистинскиот пат, кој води до Царството Небесно.

На многаја лета, Високопреосвештени Владико!