НАЈНОВО ОД ДЕБАРСКО-КИЧЕВСКАТА ЕПАРХИЈА

Горен од љубовта кон Христа и хранет со млекото на добродетелите, светиот Климент, Охридскиот Чудотворец, стана извор на милост и скоро застапништво на сите кои го повикуваат во молитвите. Најверниот ученик на словенските браќа, светите Кирил и Методиј, неуморно го продолжи нивното дело, проповедајќи го Словото Божјо меѓу македонскиот народ. Со своето севкупно дело: поучувањето, проповедањето, ширењето на христијанството на нашите простори, помагањето на сиромашните, сета просветителска, црковна, пастирска и книжевна дејност, светиот Климент се издигна во вистински корифеј на верата меѓу сите словенски народи, а особено во нашата света црква, чиј застапник и покровител е токму светиот Климент.

Затоа и ова 2016-то лето Господов, кога се навршуваат 1100 години од блаженото упокојување на свети Климент Охридски, беше година посветена на нашиот апостол. И кога е најдобро да се прослави овој голем Јубилеј, ако не на денешниот ден, во Неделата на сите македонски светии. По овој повод, и Светиот архиерејски синод на Македонската православна црква - Охридска архиепископија, организираше повеќе торжества, свечено и достојно прославувајќи го покрстителот и учителот на македонскиот народ. 

„За огнот не се грижеа, и за многуразличните маки и за смртта достојна за почит, бидејќи добрината на најпрекрасниот Жених со вера ја бараа, откако со различни рани се украсија, со Него се соединија фиданките на Софија: Вера, Надеж и Љубов; поради нив, Господи, од јароста ослободи нè“ (Стихира на Господи повикав... на Вечерна на св. мч-чки Вера, Надеж и Љубов и мајка им Софија).

На 30.09.2016 година, денот кога го прославуваме споменот на светите маченички Вера, Надеж и Љубов, и мајка им Софија, во катедралниот храм „Св. Софија“ во Охрид, беше отслужена света архиерејска Литургија, на која чиноначалствуваше Неговото Високопреосвештенство Митрополитот Дебарско-кичевски г. Тимотеј, во сослужение на архимандритот Нектариј, протоереите Никола Христоски, Димче Ѓорѓиески и Игор Никовски, свештениците Димче Азески, Владо Недески, Ѓорѓи Блажески и Љупчо Бакрачески, протоѓаконот Николче Ѓурѓиноски и ѓаконите Сашо Целески и Зоран Ставрески. Овој свечен ден стана уште поторжествен, со ракополагањето на ѓаконот Зоран Ставрески во презвитерски чин од раката на Митрополтиот Тимотеј. Од името на целата Епархија, му го честитаме презвитерскиот чин на отец Зоран, и се молиме достојно да служи на Бога и на светата Македонска православна црква, а за спасение на неговата душа и на паството кое ќе му биде доверено. По завршувањето на Литургијата, Митрополитот Тимотеј се обрати кон верниот народ со пригодна беседа, која интегрално ви ја пренесуваме. 

„Исус Навин таинствено го прасликуваше крсниот знак, во она време, кога рацете ги рашири крстовидно, Спасителу мој, и сонцето застана додека тој не ги победи оние што Ти се противеа Тебе, Боже; сега, пак, гледајќи Те на крстот, тоа се затемни и, кога силата на смртта ја разурна, целиот свет го подигна со Себе“ (седален на Утрена на Воздвижение на чесниот и животворен Крст).

Денес Крстот се издигнува и светот го осветува, зашто смртта што светот ја прими преку вкусувањето од забранетото дрво, денес друго дрво, Крстот, ја уништи. Денеска и демонските сили се плашат, а земните краеви прославуваат, зашто Крстот стана чувар на сета вселена, красота на Црквата, сила на царевите, поткрепа на верните, слава на ангелите и рана за демоните.

На овој торжествен и победоносен ден, на 27.09.2016 година, во манастирот „Св. вмч. Георгиј“ во Рајчица, Дебар, беше отслужена света архиерејска Литургија, на која чиноначалствуваше Неговото Високопреосвештенство Митрополитот Дебарско-кичевски г. Тимотеј, во сослужение на архимандритот Партениј, протоерејот Никола Христоски, еромонасите Доситеј, Макариј, Еразмо, Ефросиниј и Кирил, протоѓаконот Николче Ѓурѓиноски и ероѓаконите Порфириј и Силуан. По завршувањето на Литургијата, беше извршен чинот на Мал водосвет и беше прекршен празничниот колач, а Митрополитот Тимотеј се обрати кон многубројниот верен народ со пригодна беседа, која подолу во целост ви ја пренесуваме.

Празникот на чесниот и животворен Крст, беше одбележан и со уште една голема радост. Имено, под самиот манастир, Митрополитот Тимотеј го постави и го освети поставен камен-темелникот за новиот конак во ова наше светилиште, чиј иницијатор е игуменот на манастирот, архимандритот Партениј. Конакот ќе се гради со донацијата на г-ѓа Елена Пандева од Скопје. Во продолжение ви ја пренесуваме беседата на Митрополитот Тимотеј.

„Ти, единствена, си Го родила Бога преславно, Дево; ти си ја обновила природата со твоето раѓање, Марие! Ти си ја ослободила Ева од првородната клетва, Богородице Пречиста!“ (песна од канонот на Утрена на Рождество на Пресвета Богородица).

Празнувањето на споменот на великиот празник на Рождеството Богородично, продолжи на самиот ден, на 21.09.2016 година, во манастирот „Пресвета Богородица - Пречиста“ во Кичево, со света архиерејска Литургија, на која чиноначалствуваше Неговото Високопреосвештенство Митрополитот Дебарско-кичевски г. Тимотеј, во сослужение на протоереите Димче Ѓорѓиески и Никола Христоски, свештениците Владо Недесеки, Александар Матески, Љупчо Бакрачески и Александар Крстаноски, протоѓаконот Николче Ѓурѓиноски и ѓаконот Сашо Целески. Празникот беше збогатен и со нова хиротонија. Имено, Митрополитот Тимотеј го ракоположи во ѓаконски чин завршениот богтослов Зоран Ставрески од Македонски Брод. Зоран е роден на 17.07.1984 година во Прилеп. Основно образование завршил во Македонски Брод, а средно во МПБ „Св. Климент Охридски“ во Скопје. Моментално е студент на ПБФ „Св. Климент Охридски“ во Скопје. Од името на Митрополитот, како и од името на целата епархија, му го честитаме ѓаконскиот чин на Зоран, со молитви кон нашиот Спасител и Мајката Божја, тие секогаш да го чуваат на патот на спасението, та верно и непорочно да служи на нашата света Црква.

По завршувањето на Литургијата, беше извршен чинот на Мал водосвет и беше прекршен празничниот колач, а Митрополитот Тимотеј се обрати кон верниот народ со пригодна беседа, која ви ја пренесуваме во целост.   

„Една почва порано неплодна, раѓа земја плодоносна, и неплодната, со свое млеко, го храни светиот плод што го даде од својата утроба. Чудо страшно! Хранителката на нашиот живот, која во утробата Го прими Небесниот Леб, со млеко од дојка се храни!“ (стихира на Господи повикав... на Мала Вечерна на Рождество на Пресвета Богородица).

Онаа која Го роди и израсна Избавителот од смртта, Господ Исус Христос, денес се раѓа од порано неплодната Ана, и ни засветли како облак светлина. затоа ние недостојните, и пееме и со смелост и се обраќаме на Пречистата: Твоето раѓање, радост и јави на сета вселена! Торжествувањето на овој голем ден на Рождеството на Мајката на нашиот Господ, најпрво го започнавме со посета на манастирот „Пресвета Богородица“ во с. Г. Манастирец, Македонски Брод, каде беше отслужена Акатист на Пресвета Богородица. Во Вечерните часови, во манастирот „Пресвета Богородица - Пречиста“ во Кичево, беше отслужена свечена Вечерна богослужба,  на која чиноначалствуваше Неговото Високопреосвештенство Митрополитот Дебарско-кичевски г. Тимотеј, во сослужение на протоереите Димче Ѓорѓиески, Темелко, Стевчо Тошевски и Никола Христоски, свештениците Ристо Камбуроски, Владо Недески, Александар Матески и Александар Крстаноски, протоѓаконот Николче Ѓурѓиноски и ѓаконот Сашо Целески. По Вечерната богослужба, беше отслужен и Акатист на Пресвета Богородица, а Митрополитот Тимотеј се обрати кон многубројниот верен народ со пригодна беседа, која интегрално ви ја пренесуваме.