НАЈНОВО ОД ДЕБАРСКО-КИЧЕВСКАТА ЕПАРХИЈА

„Не сметајќи ја за ништо привремената убавина, си поднел различни маки, радувајќи се, Георгие, со надеж во божествениот живот. Пренебрегнувајќи ги страшните измачувања, со цврста душа си говорел: Дела Господови, пејте Му на Господа, и превозносете Го во сите векови“ (песна од Канонот на Утрена на св. вмч. Георгиј).

Откако го прославивме светиот великомаченик Георгиј, според одамна востановената традиција во Струга, празнувањето продолжи и ден потоа, на 07.05.2016 година. Празнувањето на Великиот Георгиј, започна во утринските часови, во храмот „Св. вмч. Георгиј“, со света архиерејска Литургија, на која чиноначалствуваше Неговото Високопреосвештенство Митрополитот Дебарско-кичевски г. Тимотеј, во сослужение на архимандритот Нектариј, протоерејот Никола Христоски, свештениците Васко Голабоски и Петре Бојчиноски, протоѓаконот Николче Ѓурѓиноски и ѓаконот Христијан Костоски. По завршувањето на Литургијата, Митрополитот Тимотеј се обрати кон верниот народ со пригодно слово, со кое ги поучи верните дека секој кој сака да земе учество во Воскресението Христово, треба да земе и учество во Неговиот Крст. 

„Маченику Христов, страдалнику, спаси ги оние што се во напасти, со твоите молитви избавувајќи ги од секаква беда и, изгонувајќи секаква лута душегубна тага, благодат и милост за нас испроси ни; та, спасени со твоите молитви, радувајќи се, сите да ги почитуваме твоите чесни подвизи, Георгие“ (хвалитна стихира на Утрена на свети вмч. Георгиј).

На 06.05.2016 година, на Светли Петок и на празникот на св. вмч. Георгиј - Ѓурѓовден, во манастирот „Св. вмч, Георгиј“ во Рајчица, Дебар, беше отслужена света архиерејска Литургија, на која чиноначалствуваше Неговото Високопреосвештенство Митрополитот Дебарско-кичевски г. Тимотеј, во сослужение на архимандритот Партениј, протоерејот Никола Христоски, еромонасите Доситеј, Макариј, Ефросиниј и Кирил, свештеникот Благоја Спироски, протоѓаконот Николче Ѓурѓиноски и ероѓаконите Порфириј и Силуан. По завршувањето на Литургијата, беше извршен чинот на Водосвет во Светлата седмица и беше прекршен празничнииот колач, а Митрополитот Тимотеј се обрати кон многубројниот верен народ со пригодна беседа, која интегрално ви ја пренесуваме.

„Господи, како што си излегол од запечатениот гроб, така си влегол и низ заклучените врати при Твоите ученици, покажувајќи им ги телесните страдања што си ги поднел, долготрпелив Спасителе. Како Давидов потомок си претрпел рани, а како Син Божји си го ослободил светот. Голема е Твојата милост, недостижен Спасителе, помилуј нè, и спаси нè“ (хвалитна стихира на Утрена на Светли Четврток).

На 05.05.2016 година, во Четвртокот од Светлата седмица, во манастирот „Св. Јован Богослов“ -Канео во Охрид, беше отслужена света архиерејска Литургија, на која чиноначалствуваше Неговото Високопреосвештенство Митрополитот Дебарско-кичевски г. Тимотеј, во сослужение на архимандритот Нектариј, протоерејот Никола Христоски, свештениците Димче Азески и Љупчо Бакрачески и ѓаконот Сашо Целески. По завршувањето на Литургијата, беше извршен чинот на Водосвет во Светла седмица и беше прекршен празничниот колач, а Митрополитот Тимотеј се обрати кон верното стадо со пригодна беседа, која интегрално ви ја пренесуваме.

„Со радост се исполни вселената, кога ја прими веста за Воскресението; Марија Магдалина дојде на гробот и најде ангел седнат на каменот, во облека што болскаше, и кој говореше: Зошто Го барате Живиот меѓу мртвите? Не е овде, но воскресна, како што рече: Пред вас ќе одам во Галилеја“ (хвалитна стихира на Утрена во Вторник од Светла седмица).

На 03.05.2016 година, на Третиот ден од прославувањето на торжеството над трожествата, Воскресението Христово, во храмот „Св. Петар и Павле“ во Кичево, беше отслужена света архиерејска Литургија, на која чиноначалствуваше Неговото Високопреосвештенство Митрополитот Дебарско-кичевски г. Тимотеј, во сослужение на архимандритот Нектариј, протоерејот Стевчо Тошевски, свештениците Ристо Камбуроски и Александар Матески и протоѓаконот Николче Ѓурѓиноски. По завршувањето на Литургијата, Митрополитот Тимотеј им го честита празникот на верниците од Кичево со пригодно слово и им подели нафора.

„Нека кажат Јудеите како војниците Го погубија Царот што Го чуваа, и зошто каменот не го дочува Каменот на животот? Или погребаниот да Го дадат, или на Воскреснатиот да Му се поклонат, говорејќи со нас: Слава на мноштвото Твои штедрости, Спасителе наш, слава Ти“ (хвалитна стихира на Утрена на Понеделник до Светла седмица).

На 02.05.2016 година, на вториот ден од Воскресението Христово, во храмот „Св. вмч. Ѓорѓи“ во Струга, беше отслужена света архиерејска Литургија, на која чиноначалствуваше Неговото Високопреосвештенство Митрополитот Дебарско-кичевски г. Тимотеј, во сослужение на архимандритот Нектариј, протоерејот Никола Христоски, свештениците Васко Голабоски и Љупчо Бакрачески, протоѓаконот Николче Ѓурѓиноски и ѓаконот Христијан Костоски. По завршувањето на Литургијата, Митрополитот Тимотеј се обрати он верните чеда со пригодно слово, во кое се задржа на Воскресението Христово, како централен настан во животот на Црквата и на секој човек, и се помоли на Воскреснатиот Христос, Он да се всели во нашите срца и да воскресне и во нас, та и ние да се удостоиме за Неговото славно и спасоносно Воскресение.