НАЈНОВО ОД ДЕБАРСКО-КИЧЕВСКАТА ЕПАРХИЈА

„Со твоите мудри зборови јасно се победува безбожничкото собрание, преславен Григорие, солунски пастиру; и, како што дим исчезнува, исчезна и гнилото безумие, со твојот јазик громогласен и богословски“ 

Светата Црква Христова определила прославување и празнување на големи настани и значајни личности во Неделите од Великиот пост. Така, во првата Недела ја прославивме победата на иконата и на уметноста воопшто, па не залудно оваа недела го добила името Недела на православието. Во оваа втора Недела од Великиот пост, го прославуваме споменот на великиот подвижник и татко на исихастите, светиот Григориј Палама, кој цврсти и неотстапно учеше дека вечниот живот ќе биде наше вечно заедничарење со Бога, наше лично и живо учество во Бога. Во вечниот живот, пак, може да се влезе единствено преку несоздадената Божја благодат и несоздадените Божји енергии, за кои толку многу ни зборува светиот Григориј. 

Во Втората недела од Великиот пост, на 27.03.2016 година, во параклисот „Св. Григориј Палама“, кој се наоѓа во манастирот „Св. вмч. Георгиј“ во с. Рајчица, Дебар, беше отслужена света архиерејска Василиева Литургија, на која чиноначалствуваше Неговото Високопреосвештенство Митрополитот Дебарско-кичевски г. Тимотеј, во сослужение на архимандритот Партениј, игумен на манастирот, протоерејот Никола Христоски, еромонасите Доситеј, Макариј, Ефросиниј и Кирил, свештеникот Миле Ангеловски, протоѓаконот Николче Ѓурѓиноски, ероѓаконите Порфириј и Силуан и ѓаконот Павел Крцоски. По завршувањето на Литургијата, беше осветено коливото, а Митрополитот Тимотеј се обрати кон неизбројниот верен народ со пригодна беседа, која подолу во целост ви ја пренесуваме.

Празникот на светиот Григориј Палама ќе остане особено запаметен и за ѓаконот Павел Крцоски, кој од рацете на Митрополитот Тимотеј го прими свештеничкиот чин. Павел Крцоски е роден на 03.07.1973 година во Охрид, од благочестиви родители, татко Науме и мајка Младенка. Основно образование завршува во Охрид, а средно во МПБ „Св. Климент Охридски“ во Скопје. Високо образование завршил на ПБФ „Св. Климент Охридски“ во Скопје, а долги години работи во Дебарско-кичевската епархија во Охрид. Од името на Митрополитот Тимотеј, како и од името на целата епархија, му го честитаме свештеничкиот чин на отец Павел, а светиот Григориј Палама нека го води по патот на заедничарењето со Бога, Кому треба верно да Му служи пред неговиот Престол.

Во продолжение ви ја пренесуваме беседата на Митрополитот Тимотеј.

Митрополит Тимотеј

Во името на Отецот и Синот и Св. Дух.

Драги браќа и сестри,

Во втората недела од Велигденскиот пост, којашто е посветена на св. Григориј Палама, светата Црква го чита евангелието за добриот пастир. Во евангелието, прочитано на светата Литургија, Самиот Господ Исус Христос за Себе вели: „Јас сум вратата: кој ќе влезе преку Мене, ќе се спаси; и ќе влезе и ќе излезе и пасиште ќе најде" (Јн. 10, 9). Понатаму, пак, вели: „Јас сум добриот Пастир; добриот пастир си ја полага душата своја за овците" (Јн. 10, 11).

Нашиот Спасител, поучувајќи ги Своите следбеници, честопати земал примери од секојдневниот живот. Примери преку кои, апостолите и останатиот народ кој Го слушал, можеле полесно да ја разберат Неговата наука и поуката што ја упатувал кон нив.

Палестина е сиромашна земја и таму луѓето чувале стада во мал број. Но, се случувало, особено вечерно време, да соберат неколку стада и да ги затворат во едно трло, или, пак, во некоја природна пештера, со што би ги заштитиле од дивеч и од разни крадци. Така Господ Христос го претставува царството Божјо. Односно, како едно трло, или една пештера, во која се влегува преку една врата. Таа врата е Самиот Господ Исус Христос. Таа врата е Неговата наука, Неговата љубов и Неговиот придонес за севкупниот човечки род остварен преку Неговата искупителна крстна жртва. Жртва преку која ги отвора рајските порти помирувајќи го човечкиот род со Бога и овозможувајќи му повторно да се врати во рајската наслада и во прегратките на својот Отец, Создател и Промислител.

Добриот пастир се споредува со оној пастир кој ги напасува своите овци и се грижи за нив. А овците, пак, го познаваат по гласот негов и одат по него. Така, наутро, кога разните пастири ќе ги повикаат своите овци, тие повторно се делат и го следат својот пастир. Го следат пастирот кој ќе ги напасе и ќе ги напои во текот на денот. Тука, овците се преставени како словесно стадо, односно народот Божји – овоземната Црква. Господ Христос на друго место вели: „Јас сум Алфа и Омега, почетокот и крајот" (Откр. 1, 8). Со други зборови, сака да ни каже дека сè што постои и сè што знаеме и можеме да знаеме, за видливиот и невидливиот свет, сето ќе го сознаеме само преку Него и во Него. Затоа, Он е добриот пастир Кој се жртвува за своето стадо. Додека, пак, под наемници, претставени се лажните учители кои не се грижат за својата паства, туку само за себе. Кога ќе наидат на опасности, ги оставаат луѓето на милост и немилост и бараат начин и пат да ја спасат својата сопствена кожа. Под крадец, тука е претставен ѓаволот кој со сите сили се обидува луѓето да ги навлече на зло, на пропаст и на погубување на нивната душа.

Во историјата на светата Православна црква, имаме учители, просветители и пастири, кои, со својот труд и со своето делување, се грижеле за спасението и утврдувањето во верата на стадото Христово. Еден од таквите, кој дал огромен прилог во зачувувањето на правата, вистинската вера е св. Григориј Палама. Овој Божји пастир, иако по потекло од благородничко семејство, израснат на византискиот двор, сепак, верата и монашкиот позив, му биле попривлечни од целата помпа на императорскиот двор. Напуштајќи го Цариград, оди на Света Гора каде што прима монашки завет, се подвизува и се усовршува во монашките светогорски подвизи. Во тоа време ќе се појави еден лажен учител Варлаам од Калабрија, Јужна Италија. Тој погрешно ќе учи и со омаловажување ќе пишува кон светогорската доктрина за можноста да се согледа Таворската светлина. Тогаш, св. Григориј, ќе се вклучи во одбрана на вистината и на правилното учење. Ќе напише повеќе трудови разобличувајќи го погрешното учење на овој лажен учител. Потоа, ќе биде избран за епископ на градот Солун и како добар пастир, уште повеќе ќе се потруди и ќе придонесе за зацврстувањето на православната вера меѓу својата паства. Преку неговите пишани дела, ќе даде голем прилог во богословската мисла на севкупната православна екумена. Св. Григориј Палама многу јасно прави разлика кој може да ја согледа таа преображенска светлина. Неа не може да ја согледа секој. Не може да ја согледа секој што се нарекува православен христијанин, ниту, пак, секој епископ или клирик. Но, таа можност ја имаат само одредени просветлени и облагодатени личности, кои, со својот живот, се издигнале на многу повисоко духовно скалило. Па, така, имаат спечалено милост Божја, да можат со нивните телесни очи, да ја согледаат таа нетварна светлина.

И ние денеска, прославувајќи го овој голем Божји угодник, да се обратиме со искрена молитва кон него. Да ја поткрепи нашата вера, па и ние да можеме да ја живееме поисправно и подостоинствено. Да Го сведочиме Господа Христа во нашиот живот со добри дела. Така живеејќи и постапувајќи, да измолиме милост Божја. Па да ни ги просветли и осветли нашите умови и срца и да се покажеме пред Христа како Негови верни слуги, спечалувајќи вечен и блажен живот, сега и во сета вечност.

Ја користам оваа прилика, на новоракоположениот свештеник Павел Крцоски, да му го честитаме ракополагањето во свештенички чин и да му посакаме да се угледа на добрите пастири на светата Црква и со љубов да го пасе своето идно поверено стадо. Нека го носи свештеничкиот чин за прослава Божја, за украс на МПЦ и за спасение на неговата душа.

Втора недела од Великиот пост
27. 03. 2016 година
Манастир „Св. вмч. Георгиј Победоносец" - Рајчица