„Стражарите Твои, Господи, ги раскажаа сите чудеса; но соборот на суетните со мито им ја наполни нивната десница, мислејќи да го скрие Твоето Воскресение, што светот го слави: помилуј нè“ (Хвалитна стихира од Утрена на Светли Вторник).
На 07.05.2013 година, кога го прославуваме Воскресението Христово – трет ден, во храмот „Св. вмч. Ѓорѓи“ во Струга, беше отслужена света архиерејска Литургија, на која чиноначалствуваше Неговото Високопреосвештенство Митрополитот Дебарско-кичевски г. Тимотеј, во сослужение на Неговото Преосвештенство Епископот Велички г. Јосиф, архимандрит Нектариј, протоереј-ставрофор Илија Танаскоски, свештениците Никола Христоски и Петре Бојчиноски и ѓаконите Николче Ѓурѓиноски и Васко Голабоски. По завршувањето на Литургијата, Епископот Јосиф го прекрши празничниот колач, а Митрополитот Тимотеј се обрати кон верниците со пригодно слово, во кое ја истакна смислата на Христовото Воскресение и неговото спасително значење за човечкиот род, а неговата вистиност се потврдила и сè уште се потврдува преку многубројните мачеништва. Митрополитот Тимотеј го истакна примерот на светиот великомаченик Георгиј, и се помоли, тој да биде наш застапник пред Бога и да ни помага да одиме по патот на заповедите на Воскреснатиот Христос.