Поука од Свети Андреј Критски

Нека се радува сега сета твар, нека слави природата: ,,Росете, небеса, одозгора, и облавите нека изливаат правда” (Иса. 45, 8), ,,и горите ќе пуштат гроздов сок” (Амос 9, 13); ,,воскликнете од радост гори, зашто Господ го утеши Својот народ” (Иса. 49, 13); и нека подигне ,,рог за нашет оспасение, во домот на Давид, Својот слуга” (Лука 1, 69), пренепорочна и безмажна мајка, од Која се роди Христос, надеж и спасение на народите. Нека ликува сега секоја благодарна душа и нека природата ја повика тварта на свое обновување и пресоздавање. Неплодни, брзо собирајте се: зашто бездетната и неплодна роди божествен младенец – Дева. Мајки, радувајте се: мајка што не родила, роди нетлена Мајка и Дева. Девојки, радувајте се: ненасеана земја, неискажливо Го порасна Оној Кој се раѓа од Отецот. Жени, славете; жената во дамнина даде повод за грев и истата таа ја прими првината на спасението; жената, осудена од дамнина, се покажа оправдана од Бог, стана безмажна Мајка, избрана од Создателот, обнова на (човечкиот) род. Секое создание да славослови и да ликува, и да принесува дар, достоен за овој ден. Нека биде сега една, заедничка свеченост, и на небото и на земјата. Заедно нека празнува сè што е во светот и што е вон светот.