НАЈНОВО ОД ДЕБАРСКО-КИЧЕВСКАТА ЕПАРХИЈА

„Со Својата животворна дланка, Христос нашиот Бог ги воскресна сите умрени од мрачните долини, и на човечкиот род му даде воскресение, зашто Он е Спасителот на сите, Воскресение и живот, и Бог на вселената“ (воскресен кондак во Недела на утрена, глас 6-ти).

На 27 јули 2025 година, во Седмата недела по Педесетница и на празникот на св. ап. Акила и преп. Никодим Светогорец, во храмот „Св. Јован Крстител“ во Мислешево, Струга, беше отслужена света архиерејска Литургија, на којашто чиноначалствуваше Неговото Високопреосвештенство Митрополитот Дебарско-кичевски г. Георгиј, во сослужение на протоереј-ставрофорите Никола Христоски, Илија Танаскоски и Александар Димоски, протоереите Васко Голабоски и Христијан Костоски, протоѓаконот Николче Ѓурѓиноски и ѓаконот Ѓорѓи Наумоски. По завршувањето на Литургијата беа осветени новите фрески во тремот на храмот, а Митрополитот Георгиј се обрати кон верниот народ со пригодно слово. 

„Светата Христова маченица денес не собра да ги прославиме нејзините славни подвизи, и нејзиното божествено страдање; со нејзината доблесна душа таа, всушност, се покажа сообразна со нејзиното име - господарка на својот дух и на своите страсти“ (кондак на Утрена на св. вмч-чка Недела).

На 20 јули 2025 година, во Шестата недела по Педесетница и на денот кога го прославуваме споменот на св. вмч-чка Недела, во ман. „Св. Наум Охридски“ во Охрид, беше отслужена света архиерејска Литургија, на којашто чиноначалствуваше Неговото Високопреосвештенство Митрополитот Дебарско-кичевски г. Георгиј, во сослужение на архимандритот Нектариј (игумен на аманстирот), протоерејот-ставрофор Никола Христоски, протоѓаконот Николче Ѓурѓиноски и ероѓаконот Амвросиј. По завршувањето на Литургијата, Митрополитот Георгиј се обрати кон верниците со пригодно слово. 

„Сега пристапете весело сите вие кои сте на земјата, пријдете, светиот ковчег ве повикува тајно да ѝ оддадете почит на Богородица, чијашто риза се чува во него како скапоцена ризница“ (песна од Канонот на празникот Полагање риза на Пресвета Богородица во Влахерна).

Празникот Полагање риза на Пресвета Богородица во Влахерна и оваа година торжествено беше прославен во манастирот „Пресвета Богородица“ - Заум во с. Трпејца, Охрид, Празнувањето започна на 14 јули 2025 година во вечерните часови, кога беше отслужена празнична Вечерна богослужба, а на којашто чиноначалствуваше Неговото Високопреосвештенство Митрополитот Дебарско-кичевски г. Георгиј. Празнувањето продолжи на 15 јули, со света архиерејска Литургија, на којашто чиноначалствуваше Митрополитот Георгиј, во сослужение на архимандритот Нектариј, протоерејот-ставрофор Никола Христоски, протоерејот Горан Ставрески, свештеникот Атанас Казанџиски, протоѓаконот Николче Ѓурѓиноски и ероѓаконот Амвросиј. По завршувањето на Литургијата, беше извршен чинот на Мал водосвет и беше прекршен празничниот колач, а Митрополитот Георгиј се обрати кон верниот народ со пригодно празнично слово. Ова, всушност, беше и првата Литургијата по хиротонијата и интронизацијата на нашиот Митрополит Георгиј, токму во овој наш древен манастир, посветен на Мајката Божја. Таа нека го чува уште многу години, та да ѝ служи неа и на нејзиниот Син, нашиот Господ Исус Христос, верно и со уште многу богослужби.

Без епископот, како претстојател на Евхаристијата, не можеме да зборуваме ниту за Црква, ниту за спасение во Христа. Зашто, како што Христос се огледа во Отецот, така исто и епископот, кој е икона Христова, може да каже дека извршува Христово дело, ако биде во целост огледало или икона Христова (свети Атанасиј Велики)

Божествената Литургија е центар на животот на Црквата, и таа, всушност, е нејзиното битие. Токму затоа и претстојателот на светата Евхаристија го има централното место во Црквата, како икона Христова, како икона на Првосвештеникот, Кој принесува и се принесува. Од овие причини и секој избор на епископ во Црквата Христова е радосен чин сам по себе, а радоста станува уште поголема кај свештенството, монаштвото и верниот народ, кои во ликот на Епископот добиваат свој духовен водач, свој пастир, кој треба да го одбрани своето паство од духовните непријатели. По упокојувањето на Митрополитот Дебарско-кичевски г. Тимотеј, Светиот архиерејски синод на Македонската православна црква - Охридска архиепископија, со сета своја мудрост и далекогледост, едногласно го избра архимандритот Георгиј (Ѓорѓевски) за нов митрополит на Дебарско-кичевската епархија. Според одлуката на САС на МПЦ-ОА, наречението на новоизбраниот Митрополит Георгиј се изврши на 12 јули 2025 година, на Петровден, во храмот „Св. Климент Охридски и Св. Пантелејмон“ на Плаошник, а епископската хиротонија и интронизацијата за Митрополит Дебарско-кичевски се изврши на 13 јули 2025 година, на Павловден, во Соборниот храм на Охридските архиепископи „Св.  Софија“ во Охрид.

На 12.06.2025 година, Светиот архиерејски синод на Македонската православна црква - Охридска архиепископија, раководен од Светиот Дух, на својата редовна седница во полн состав, едногласно и еднодушно го избра Неговото Високопреподобие Архимандритот Георгиј (Ѓорѓевски) за иден Митрополит на Дебарско-кичевската епархија со седиште во Охрид. Откако се навршија шест месеци од блаженото упокојување на Митрополитот Тимотеј, ете дојде и денот кога сиот верен народ, предводен од свештенството од нашата света Епархија добива нова надеж и радост во лицето на еден од најпочитуваните професори на Богословскиот факултет, архимандритот Георгиј. Професорот, под чија палка поминаа многумина од нас, сиот свој живот го посвети за доброто на нашата света Црква, почнувајќи од неговите ученички, студентски и постстудентски денови, па сѐ до неговата заложба и подвиг за Црквата и државата како амбасадор на Р. Македонија во Ватикан. Архимандритот Георгиј е еден и од најреспектираните луѓе во нашата Црква, а без сомнеж можеме да кажеме дека беше уште повеќе ценет и од нашиот покоен Митрополит Тимотеј, кој за него секогаш зборуваше со огромна почит, со зборови на пофалба и со чувство на гордост што Црквата и државата имаат еден таков човек. Токму затоа и се јави огромна радост и восхит кај сиот верен народ од нашата Епархија, кој со биење на камбаните го поздрави изборот на Светиот синод. Ете токму затоа и Светиот Дух така ги раководеше нашиот Архиепископ Охридски и Македонски г.г. Стефан и другите архиереи да ја донесат оваа мудра одлука и да го испратат идниот Митрополит Георгиј во нашата Епархија, а со тоа да ни ја обноват надежта дека оваа Епархија ќе продолжи по својот нагорен духовен и творечки пат. Во продолжение ви пренесуваме и кратка биографија за новоизбраниот Митрополит Георгиј, како и официјалното соопштение од САС на МПЦ-ОА. Многупочитуван новоизбран Митрополиту Георгиј, со нетрпение го очекуваме Вашето доаѓање во нашата Епархија, а Господ нашиот Бог, нека Ви дава сила да ги претрпите сите искушенија на најтешката епископска служба, да Ви дарува мудрост и љубов, та многулетно да нѐ раководите сите нас за спасение на нашите души, за доброто на Македонската црква и на нашата Македонија. На многаја лета!