Поука од Свети Андреј Критски

Луѓе Божји, народе свет, свештено собрание! Да го почитуваме сеќавањето на татковците, да ја возвеличиме силата на тајната. Секој од нас, според мерата на благодатта што му е дадена, да принесе достоен дар кон ова вистинско торжество. Татковците – благосостојба на родот; мајките – благочедност; неплодните – неплодност на грев, девиците – вистинско целомудрие, односно на душата и на телото; брачните – пофално воздржание. Ако некој од вас е татко – нека му подражава на таткото на Дева; ако е некој бездетен – нека воздигне плодотворна молитва, која расте од богоугоден живот. Мајката, која ги храни своите деца – нека се радува заедно со Ана, која воспитала чедо, кое ѝ е дарувано по молитвите во неплодност. Неплодната, која не раѓала, лишена од благословен плод – нека пријде со вера кон богодадената фиданка на Ана и нека ја остави својата неплодност. Девојката, која живее непорочно, нека биде мајка на словото, украсувајќи ја со слово убавината на душата. Брачната – нека принесува умна жртва од плодовите на молитвата. Заедно „момчиња и девојки, старци со децата, земнородни и синови човечки, како богатите така и сиромасите… цареви земни и сите народи, кнезови и сите земни судии” (Псал. 148, 12; 48, 3) – сите заедно да славиме во чест на Отроковицата, Мајката на Бог и Пророчицата; од Неа потекна Пророк, пророкуван од Мојсеј, Христос Бог, вистината (5 Мојс. 18, 15).