НАЈНОВО ОД ДЕБАРСКО-КИЧЕВСКАТА ЕПАРХИЈА

На Педесетница – Духовден, во црквата „Света Троица“ во Охрид, Митрополитот Дебарско-кичевски г. Тимотеј во сослужение на повеќемина свештенослужители отслужи света Литургија. По завршувањето на Литугијата, според типикот на Црквата се отслужи и Вечерна богослужба. После завршувањето на богослужбата, Владиката заедно со останатите свештенослужители излегоа во дворот на црквата каде што се изврши мал Водосвет и се благословија и прекршија празничните лебови. Кон верниот народ Владиката се обрати со празнично слово кое интегрално ви го пренесуваме.

Споменот за светиот свештеномаченик Еразмо Охридски, свечено со празнични богослужби традиционално се одбележа во истоимениот манастир кој се наоѓа во непосредна близина на Охрид. По тој повод, на 14-ти јуни во вечерните часови Митрополитот г. Тимотеј во сослужение на повеќемина свештенослужители отслужи празнична вечерна. Култот кон овој светител во Охридско-струшкиот регион е голем, бидејќи неколку години пред крајот на својот живот свети Еразмо Евангелието го проповедал во Лихнидос, денешен Охрид. Сè до доцните вечерни часови, а исто така и наредниот ден, река од верен народ трпеливо и со молитва чекаа да влезат, да се поклонат и помолат во црквата и во пештерата во која се подвизувал светиот Еразмо и на тој начин да ја изразат својата чест кон светителот. Утредента, на 15-ти јуни во 8 часот започна утринската богослужба по која следеше и света архиерејска Литургија. По за вршувањето на Литургијата, Владиката заедно со останатите свештенослужители се упатија кон изворот, кој се наоѓа под манастирот, каде што се изврши мал Водосвет и се благословија и прекршија празничните лебови.

Празникот посветен на Вознесението Христово – Спасовден свечено со архиерејска Литургија беше прославен во истоимениот манастир во село Горно Лакочереј - Охрид. Со божествената Литургија чиноначалствуваше Неговото Високопреосвештенство Митрополит Дебарско-кичевски г. Тимотеј во сослужение на повеќемина свештенослужители. По завршувањето на Литургијата се изврши мал Водосвет и се благословија и прекршија празничните лебови.

На 16 мај 2009 година, група од професори и студенти од Православниот Богословски Факултет од Софија – Р. Бугарија, придружувани од професори од Православниот Богословски факултет од Скопје беа во посета на Охрид и охридските цркви и манастири. Во духот на братската и нелицемерна христијанска љубов, во манастирот „Свети Наум“ надлежниот архиереј, Митрополит г. Тимотеј заедно со архимандрит Нектариј на гостите им приредија свечен прием.

На 15 мај 2009 година, кога Црквата го празнува споменот на свети Атанасиј Велики (летен), во црквата посветена на свети Атанасиј која се наоѓа во непосредна близина на манастирот на свети Наум Охридски се служеше света Литургија. Со божествената Литургија чиноначалству-ваше Неговото Високопреосвештенство Митрополит Дебарско-кичевски г. Тимотеј во сослужение на архимандрит Нектариј, игумен на манастирот „Свети Наум - Охридски“, протојереј-ставрофор Тоди Јован од Албанската Православна Црква, свештеник Игор Никовски и ѓаконите Димче Азески и Николче Ѓурѓиноски. После завршувањето на Литургијата, во дворот од црквата се изврши мал Водосвет и се благослови и освети празничниот леб.