НАЈНОВО ОД ДЕБАРСКО-КИЧЕВСКАТА ЕПАРХИЈА

„Отроковице Дево, јас знам дека ти си светол и свет храм на Господа, и извор на нетление, кој излева вода - Христа, од Кого се напојуваме“ (песна од Канонот на Утрена во Петок од Светла седмица - Источен петок).

На 13.04.2018 година, во Петокот од Светлата седмица - Источен петок - Балаклија, во храмот „Св. Јован Крстител“ во Џилонг, Австралија, беше отслужена света архиерејска Литургија, на која чиноначалствуваше Неговото Високопреосвештенство Митрополитот Дебарско-кичевски и Администратор Австралиско-сиднејски г. Тимотеј, во сослужение на протоереј-ставрофор Димче Ѓорѓиески, протоерејот Чедомир Илиевски и протоѓаконот Николче Ѓурѓиноски. По завршувањето на Литургијата, Митрополитот Тимотеј се обрати кон верниот народ со пригодна беседа, која интегрално ви ја пренесуваме.

„Радувајте се, луѓе, и веселете се! Ангелот што седеше на гробниот камен, тој ни благовести, велејќи: Христос - Спасителот на светот - воскресна од мртвите, и со благопријатна миризба ја исполни вселената. Радувајте се, луѓе, и веселете се!“ (Хвалитна воскресна стихира на Утрена на Втор ден Велигден).

На 09.04.2018 година, во Понеделникот од Светлата седмица - Втор ден Велигден, во храмот „Св. вмч. Димитриј“ во Волонгонг, Австралија, беше отслужена света архиерејска Литургија, на која чиноначалствуваше Неговото Високопреосвештенство Митрополитот Дебарско-кичевски и Администратор Австралиско-сиднејски г. Тимотеј, во сослужение на протоереј-ставрофор Димче Ѓорѓиески, свештеникот Роберт Илијевски и протоѓаконот Николче Ѓурѓиноски. По завршувањето на Литургијата, Митрополитот Тимотеј се обрати кон верниот македонски народ во пригодно слово, во кое ја сподели радоста за воскреснатиот Христос, и им посака на верните чеда Воскреснатиот Христос да воскресне и во нивните души и срца и секогаш да ги упатува кон вршење добри дела, да им даде сила и меѓусебна љубов во разбрануваното море на животот, и да биде со нив и да ги укрепува во храбрите и доблесни дела за афирмација на нашата света Македонска православна црква и на маекдонскиот народ во далечната Австралија. 

„Со архангелите да го воспееме Христовото Воскресение, зашто Он е Избавителот и Спасител на нашите души, и во страшна слава, и во крепка сила, пак доаѓа да му суди на светот што го создаде“ (стихира на Господи повикав... на Вечерна во светата Недела на Пасха).

На 08.04.2018 година, на самиот ден на Воскресението Христово, во храмот „Св. Кирил и Методиј“ во Розбери, Сиднеј, Австралија, беше отслужена свечена Пасхална вечерна богослужба, или служба попозната како Второ Воскресение Христово, на која чиноначалствуваше Неговото Високопреосвештенство Митрополитот Дебарско-кичевски и Администратор Австралиско-сиднејски г. Тимотеј, во сослужение на протоереј-ставрофор Димче Ѓорѓиески, протоереите Наум Деспотоски и Александар Ивановски и протоѓаконот Николче Ѓурѓиноски. По завршувањето на богослужбата, Митрополитот Тимотеј им го честита најсветлиот Празник над празниците и се обрати кон верните чеда со пригодна беседа, која интегрално ви ја пренесуваме. 

„Дојдете да вкусиме од новиот плод на лозјето - радоста божествена и, во овој ден на Воскресение, да се приопштиме кон Царството Христово, воспевајќи Го Него како Бог, во вековите“ (песна од Канонот на Утрена во светата и велика недела на Пасха).

На 08.04.2018 година, на денот кога секое создание се радува и се весели поради Воскреснатиот Христос, Неговото Високопреосвештенство Митрополитот Дебарско-кичевски и Администратор Австралиско-сиднејски г. Тимотеј ја сподели најрадосната вест со нашите верни чеда во Австралија, во храмот „Св. Петка“ во Рокдејл, Сиднеј. Со него сослужуваа протоереј-ставрофор Димче Ѓорѓиески, протоерејот Александар Ивановски, свештеникот Владо Недески и протоѓаконот Николче Ѓурѓиноски. По завршувањето на Литургијата, беше прочитано Велигденското послание, со кое Архиепископот Охридски и Македонски г.г. Стефан, заедно со членовите на Светиот архиерејски синод на Македонската православна црква - Охридска архиепископија, им го честита најторжествениот празник на своите верни чеда насекаде во светот. Истото ви го пренесуваме во целост. 

„Денес адот стенкајќи вика: Подобро ќе ми беше ако не Го примев родениот од Марија; оти, кога дојде при мене, моќта ми ја разурна, вратите бакарни ги скрши, душите што порано ги држев, бидејќи е Бог, ги воскресна. Слава му, Господи, на Твојот Крст и на Твоето воскресение“ (стихира на Господи повикав... на Вечерна на Велика Сабота).

На 07.04.2018 година, во светата и Велика Сабота и на празникот Благовештение, во храмот „Св. Никола“ во Кабрамата, Сиднеј, Австралија, беше отслужена света Архиерејска Василиева Литургија, на која чиноначалствуваше Неговото Високопреосвештенство Митрополитот Дебарско-кичевски и Администратор Австралиско-сиднејски г. Тимотеј, во сослужение на протоереј-ставрофор Димче Ѓорѓиески, протоереите Наум Деспотоски и Александар Ивановски, свештеникот Игор Младеновски и протоѓаконот Николче Ѓурѓиноски. По завршувањето на Литургијата, Митрополитот Тимотеј се обрати кон вернио народ со пригодна беседа, која ви ја пренесуваме во целост.