НАЈНОВО ОД ДЕБАРСКО-КИЧЕВСКАТА ЕПАРХИЈА

„Самиот себе се принесе на Христа како чесно свештенство, себлажени, кој ги љубеше Неговите рани, и не се исплаши ни од свирепоста на мачењето, ниту од заканите на мачителите, премудар Еразмо, туку, радувајќи се, си Му викал на твојот Господ и Бог на сите: Те знам и Те славам, Слове Божји, со Отецот и со Духот“ (стиховна стихира на Вечерна богослужба на свети Еразмо Охридски).

Светиот Еразмо Охридскиот Чудотворец, со својата проповед со уста и срце, но, пред сè, со подвигот на својот живот, остава вечен белег во животот на христијаните, како на Исток, така и на Запад. Неговиот спомен особено го прославуваат верниците од охридско-струшкиот крај, кои не ретко слушнале, или лично биле вклучени во едно од многуте за нас познати чуда, извршени и измолени токму од светиот Еразмо. Затоа и манастирот „Св. Еразмо“ во Охрид, на овогодинешниот празник на светителот, на 14 и 15 јуни, беше исполнет со реки од верен народ, кои трпеливо чекаа во колони да запалат свеќа и да се помолат на светиот Еразмо. А според сведоштвата на сите кои долги години го посетуваат местото каде светителот се подвизувал, не се памети да имало толкав број на верници на овој ден. 

„Ангелите им говореа на апостолите кои гледаа: Луѓе Галилејци, зошто се чудите на Вознесението на Животодавецот Христа? Он ќе дојде пак на земјата да и суди на целата вселена, како најправеден Судија“ (песна од Канонот на Утрена на Вознесение Христово). 

На 09.06.2016 година, на денот кога го празнуваме великиот празник на Вознесението Христово, во манастирот „Вознесение Христово“ („Св. Спас“) во с. Г. Лакочереј, Охрид, беше отслужена света архиерејска Литургија, на која чиноначалствуваше Неговото Високопреосвештенство Митрополитот Дебарско-кичевски г. Тимотеј, во сослужение на архимандритот Нектариј, протоерите Никола Христоски и Димче Ѓорѓиески, свештеникот Љупчо Бакрачески и протоѓаконот Николче Ѓурѓиноски. По завршувањето на Литургијата, беше извршен чинот на Мал водосвет и беше прекршен празничниот колач, а потоа се изврши и свечена литија околу храмот. Митрополитот Тимотеј се обрати кон многубројниот верен народ со пригодна беседа, која интегрално ви ја пренесуваме.

„Христе Боже, Кој се воплоти од неизмерна љубов, поради милосрдието на Твоите неискажливи штедроти, со божествена светлина го удостои слепиот кој беше лишен од светлина уште од утробата, кога со кал ги намачка неговите очи со Твоите Творечки прсти. Самиот Ти, Дарителу на светлина, озари ги и нашите душевни сетила, како единствен неисцрпен во давањето“ (хвалитна стихира на Утрена на Шеста недела по Пасха).

На 05.06.2016 година, во Шестата недела по Пасха - Неделата на слепиот, и на празникот на преп. Михаил Синадски и преп. Ефросинија Полоцка, во манастирот „Пресвета Богородица“ - Захумска, во с. Трпејца, Охрид, беше отслужена света архиерејска Литургија, на која чиноначалствуваше Неговото Блаженство Архиепископот Охридски и Македонски г.г. Стефан, во сослужение на Митрополитот Дебарско-кичевски г. Тимотеј и Митрополитот Повардарски г. Агатангел, архимандритот Нектариј, протоереите Никола Христоски и Димче Ѓорѓиески, свештеникот Атанас Казанџиски, протоѓаконите Антонио Дујовски и Николче Ѓурѓиноски и ѓаконите Сашо Целески и Васил Ристовски. По завршувањето на Литургијата, Архиепикопот Стефан се обрати пред верниот народ со пригодна беседа, која подолу интегрално ви ја пренесуваме.

„Како ризница скапоцена и извор кој на земните им точи реки што ги очистуваат болестите, нам ни се даде твоето свештено тело, кое дава исцеление за различни болести, и божествена благодат на оние, кои доаѓаат кај него, за да извикаме: Радувај се, цару Владимире!“ (кондак на свети Јован Владимир).

Свети Јован Владимир е еден од најзначајните словенски светии, чиј живот бил украсен со кротост и смиреност, иако самиот тој бил владетел, односно кнез на Дукља. Црковната историја го забележува како исповедник на православната вера, просветител, но и маченик. Житието зборува дека подигал цркви и манастири, праќал учители за Христовата наука меѓу својот народ, а и самиот тој живеел богоугодно и во молитва, секогаш подготвен да го жртвува својот живот, за да го спаси својот народ од маки и страдања. Токму затоа и неговиот култ бил длабоко распространет насекаде меѓу словенските народи, а особено на просторите на древната Охридска архиепископија.

На 27.05.2016 година, Неговото Високопреосвештенство Митрополитот Дебарско-кичевски г. Тимотеј, зеде учество во чинот на осветување на новиот руски крст во Лешочкиот манастир, поставен по иницијатива на Руската амбасада во Р. Македонија, како сведоштво и благодарност за примањето на руските монаси, кои бегаа од прогонот на комунистичкиот режим во Русија. На чинот на осветувањето чиноначалствуваше Неговото Блаженство Архиепископот Охридски и Македонски г.г. Стефан, во сослужение на Митрополитите Тимотеј, Иларион и надлежниот Митрополит Јосиф, како и на повеќе свештенослужители од Македонската православна црква. Пред присутните најпрво се обрати амбасадорот на Руската федерација во РМ, г-дин Олег Шчербак, како и неговата сопруга, а по осветувањето на крстот, со пригодно слово, се обрати и Архиепископот Стефан. На овој свечен чин присуствување и делегација од Вааламскиот манастир, предводена од игуменот Методиј, кој од страна на Светиот архиерејски синод на Македонската православна црква - Охридска архиепископија, беше одликуван со Орден на свети Климент од Прв ред, за неговиот придонес во зацврстувањето на духовните врски меѓу Руската и Македонската православна црква - Охридска архиепископија и промовирањето на духовната култура меѓу македонскиот и рускиот православен народ. Со Орден на свети Климент од Трет ред, Светиот синод го одликува и Андреј Николаевич Деменко, поради промоција на православните вредности и поддршка на православните светињи.