НАЈНОВО ОД ДЕБАРСКО-КИЧЕВСКАТА ЕПАРХИЈА

Почитувани верни чеда на Македонската православна црква - Охридска архиепископија, во деновите што следат, поточно на 08 и 09 јуни 2024 година, во нашиот славен и древен Охрид, ќе биде одбележан важен настан за нашата света Црква, а тоа е канонизацијата на светите исповедници Спасе и Спаса Вишенски. По тој повод, на 08 јуни, во 16.00 часот, во храмот „Св. Атанасиј“ во с. Вишни, ќе биде отслужена Вечерна богослужба и измивање на моштите. Во 17.00 часот, во храмот „Св. Софија“ во Охрид, ќе биде отслужена Вечерна богослужба, на којашто ќе чиноначалствува Неговото Високопреосвештенство Митрополитот Плаошко-струшки и Дебарско-кичевски и Администратор Австралиско-сиднејски г. Тимотеј, а по завршувањето на Вечерната, ќе бидат пречекани моштите на Вишенските светии, кои и ќе бидат изложени во храмот. Потоа ќе биде направен и последниот парастос. Утредента, на 09 јуни, во храмот „Св. Софија“ ќе биде отслужена света архиерејска Литургија, на којашто ќе чиноначалствува Неговото Блаженство Архиепископот Охридски и Македонски и на Јустинијана Прима г.г. Стефан, во сослужение на повеќе архиереи и свештенослужители, а на Литургијата ќе биде и официјално објавена одлуката за канонизацијата на Вишенските светии. Го повикуваме верниот народ да се приклучи на овие историски збиднувања од животот на нашата света Македонска црква, заедно и да ги пречекаме моштите на светите на Вечерната, кога ќе може и да се поклониме на светите мошти, како и сите заедно да земеме учество во официјалната канонизација и  во едната света Чаша. 

„Крстот светол што ти се јави од небесата, си им го проповедал на сите, просветлувајќи ги јасно народите, славен Јоване Владимире; со пролевањето на својата крв си се украсил, и си се удостоил за непропадливите почести, стоејќи пред Света Троица; затоа со смелост моли се за нас на Христа нашиот Бог“ тропар на св. Јован Владимир).

На 04.06.2024 година, денот кога г прославуваме споменот на светиот Јован Владимир и на светиот праведен Мелхиседек, Неговото Високопреосвештенство Митрополитот Плаошко-струшки и Дебарско-кичевски и Администратор Австралиско-сиднејски г. Тимотеј, во сослужение на протоерејот-ставрофор Никола Христоски, свештеникот Димитрија Павлески и протоѓаконот Николче Ѓурѓиноски, изврши преосветување на храмот „Св. Јован Владимир“ во с. Подгорци, Струга. Храмот започнал да се гради во 1924 година, а се изградил наредната 1925 година. Сегашната реконструкција на храмот започна во 2021 година, со заложбите и со донација на г-дин Владо Пупиноски, како и со поддршката и помошта од иницијативниот и црковниот одбор од селото. Храмот е целосно фрескоживописан од зографот Тони Милцов, а иконостасот потекнува од 1925 година, а сега е реставриран од страна на г-дин Перо Шутиноски. Поставен е и нов мермерен под и нов престол. По осветувањето на храмот, беше отслужена и света архиерејска Литургија, а по завршувањето на Литургијата, Митрополитот Тимотеј се обрати кон верниот народ со пригодна беседа, којашто интегрално ви ја пренесуваме. 

Почитувани верни чеда на Дебарско-кичевската епархија, во прилог Ви ја пренесуваме беседата од Неговото Високопреосвештенство Митрополитот Плаошко-струшки и Дебарско-кичевски и Администратор Австралиско-сиднејски г. Тимотеј, во Петтата Недела на Воскресението Христово - Неделата на Самарјанката и на празникот на св. мч. Талалеј. 

Почитувани верни чеда на Дебарско-кичевската епархија, во прилог Ви ја пренесуваме беседата од Неговото Високопреосвештенство Митрополитот Плаошко-струшки и Дебарско-кичевски и Администратор Австралиско-сиднејски г. Тимотеј, во 4 Недела на Воскресението Христово - Неделата на раслабениот. 

На 24.05.2024 година, денот кога ги прославуваме македонските и сесловенски просветители светите солунски браќа Кирил и Методиј, во базиликата „Св. Климент Папа Римски“ во Рим, каде што почиваат светите мошти на светиот Кирил Солунски, беше отслужен Молебен во чест на светите рамноапостолни браќа Кирил и Методиј, на којшто чиноначалствуваше Неговото Високопреосвештенство Митрополитот Плаошко-струшки и Дебарско-кичевски и Администратор Австралиско-сиднејски г. Тимотеј, во сослужение на Неговото Високопреосвештенство Митрополитот Европски г. Пимен, протоерејот-ставрофор Никола Христоски, свештеникот Кирил Павлески и протоѓаконот Николче Ѓурѓиноски. На Молебенот присуствуваше Претседателот на Македонија г-ѓа Гордана Силјаноска Давкова, како и многубројни гости. По завршувањето на Молебенот, Митрополитот Тимотеј се обрати со пригодна беседа, којашто ви ја пренесуваме интегрално.