Местоположба и значење
Црквата „Св. Јован Богослов“, позната и како „Св. Јован Канео“, е изградена на висока карпа над Охридското Езеро, западно од рибарската населба Канео. Нејзината местоположба, поставена на доминантно место со широк видик кон југоисточната и северозападната страна на езерото, ѝ дава вонредна убавина и ја вбројува меѓу најпрепознатливите симболи на Охрид. Малку повисоко над неа се наоѓа Плаошкиот манастир „Св. Климент Охридски“, а овие две цркви меѓусебно се поврзани со пешачки патеки, што дополнително ја нагласува нивната духовна и просторна поврзаност.
Архитектура и изградба
Црквата е изградена во XIII век и претставува крстокуполна градба, со впишан крст во правоаголен простор и централна осмострана купола. Во основата е градена од камен, а во горните делови се применува наизменично редење на бигор и печена тула, со што фасадата е богато декорирана, особено околу прозорците на куполата.
Фрескоживопис и подоцнежни интервенции
Најстариот фрескоживопис во црквата датира од 1290 година и е зачуван во олтарната апсида и во куполата. Подоцна, кон крајот на XIX век, биле доградени странични анекси од северната, западната и јужната страна, кои денес не постојат. Во 2006 година во црквата бил поставен нов иконостас изработен во резба, на кој се поставени икони изработени од уметникот Владо Коцарев од Охрид.
Богослужбен живот и заштита
Во оваа црква неколкупати во годината се служи света Литургија, а таа е секојдневно отворена за верници и посетители. Републичкиот завод за заштита на спомениците на културата на Република Македонија за оваа црква има евидентирано 50 икони.
