НАЈНОВО ОД ДЕБАРСКО-КИЧЕВСКАТА ЕПАРХИЈА

На 26 јули 2009 година, Седма недела по Педесетница, во селото Скребатно - Охридско се изврши преосветување на црква посветена на Успението на Пресвета Богородица. Црквата е изградена 1928 година, но бидејќи се наоѓала во руинирана состојба, во поново време после преземените активности за нејзина санација, истата е доизградена и фрескоживописана. Чинот преосветување го изврши Неговото Високопреосвештенство Митрополит Дебарско-кичевски г. Тимотеј во сослужение на архимандрит Нектариј, протојереј-ставрофор Ефтим Бетински, јереј Кирил Јованоски, јереј Игор Никовски, јеромонах Јосиф и ѓаконите Димче Азески и Николче Ѓурѓиноски. После чинот на преосветување се отслужи света божествена архиерејска Литургија со која чиноначалствуваше Митрополит г. Тимотеј. Кон верниот народ Владиката се обрати со поучно слово кое интегрално ви го пренесуваме.

bridge media | 【国内4月24日発売予定】ナイキ ウィメンズ エア アクア リフト 全2色 - スニーカーウォーズ

На 15 јули 2009 година, кога се празнува споменот за Положувањето на ризата на Пресвета Богородица во Влахерна, во црквата „Света Богородица-Перивлепта“ во Охрид се отслужи света архиерејска Литургија. Со божествената Литургија чиноначалствуваше Неговото Високопреосвештенство Митрополит г. Тимотеј во сослужение на протојереј Сашо Богданоски, јереј Димче Ѓорѓиески, јереј Игор Никовски, јереј Никола Христоски и ѓаконите Димче Азески и Николче Ѓурѓиноски.

На 14 јули 2009 година, денот кога Црквата го слави споменот на светите бесребреници и чудотворци Козма и Дамјан, во истоимената црква во село Пештани, Охридско, се служеше света архиерејска Литургија со која чиноначалствуваше Неговото Високопреосвештенство Митрополит Дебарско-кичевски г. Тимотеј во сослужение на повеќемина свештенослужители. Кон верниот народ Владиката се обрати со поучно слово кое интегрално ви го пренесуваме.

Празникот на светите апостоли Петар и Павел, во Дебарско-кичевска епархија со света божествена архиерејска Литургија беше прославен во истоимениот храм во Кичево. Со божествената Литургија чиноначалствуваше Неговото Високопреосвештенство Митрополит г. Тимотеј во сослужение на архимандрит Нектариј, протојереј Војне Ристески, јереј Стевче Тошески, јереј Игор Никовски и ѓакон Николче Ѓурѓиноски. Верниот народ, кој со пост и молитва се подготвувал пристапи кон светиот Путир причестувајќи се со Телото и Крвта Христова. После завршувањето на Литургијата, Владиката заедно со свештенослужителите излегоа во дворот на црквата каде се изврши мал Водосвет и се благослови и прекрши празничниот леб. Кон многубројниот верен народ, Владиката се обрати со празнично слово кое интегрално ви го пренесуваме.

Празникот посветен на преподобниот Наум Охридски Чудотворец, во Дебарско-кичевска епархија торжествено со празнични богослужби беше прославен во неговиот манастир кој се наоѓа на јужниот брег на Охридското Езеро. Вечерта, на 02.07.2009 г., со почеток во 19 часот започна празничната Вечерна богослужба со која чиноначалствуваше Неговото Високопреосвештенство Митрополит повардарски г. Агатангел во сослужение на: архимандрит Нектариј, игумен на манастирот, архимандрит Партениј, игумен на манастирот „Свети Јован- Бигорски“, како и повеќемина други свештенослужители од епархијата.