НАЈНОВО ОД ДЕБАРСКО-КИЧЕВСКАТА ЕПАРХИЈА

„Сите набожно да ја воспееме сечесна Параскева, светата застапница на оние кои се во неволји, зашто таа го остави гнилежниот живот, и прими негнилежен за вечноста; затоа, по Божја заповед, најде слава и благодат да прави чудеса“ (кондак на Утрена на празникот на преп. мајка Параскева - света Петка).

На 27.10.2022 година, на празникот на преподобната мајка Параскева - света Петка, во храмот „Св. вмч. Ѓорѓи“ во Охрид, беше отслужена света архиерејска Литургија, на којашто чиноначалствуваше Неговото Високопреосвештенство Митрополитот Плаошко-струшки и Дебарско-кичевски и Администратор Австралиско-сиднејски г. Тимотеј, во сослужение на протоереј-ставрофорите Никола Христоски, Сашо Богданоски, Димче Ѓорѓиески и Игор Никовски, свештеникот Горан Ставрески, протоѓаконот Николче Ѓурѓиноски и ѓаконот Марко Спасовски. По завршувањето на Литургијата, Митрополитот Тимотеј се обрати кон верниците со пригодна беседа, којашто ви ја пренесуваме во целост.

„Богородице Дево, ти си Гората од Духот оплодена, која Авакум ја виде како на верните им точи сладост целебна. Исцели нѐ и нас кои на твојот Син Му викаме: Благословен е Бог на нашите татковци“ (песна од канонот на Утрена на празникот Покров на Пресвета Богородица).

На 14.10.2022 година, на празникот Покров на Пресвета Богородица и на св. ап. Ананија, на св. Јован Кукузел и на св. Роман Слаткопевец, во параклисот „Покров на Пресвета Богородица“ во Митрополитската резиденција во Охрид, беше отслужена света архиерејска Литургија, на којашто чиноначалствуваше Неговото Високопреосвештенство Митрополитот Плаошко-струшки и Дебарско-кичевски и Администратор Австралиско-сиднејски г. Тимотеј, во сослужение на свештениците Горан Ставрески и Љупчо Бакрачески и ѓаконот Марко Спасовски. По завршувањето на Литургијата, беше извршен чинот на Мал водосвет и беше прекршен празничниот колач, а Митрополитот Тимотеј се обрати кон верниците со пригодна беседа, којашто интегрално ви ја пренесуваме.

„Си воскреснал од мртвите, Животе на сите, и ангел светол им викаше на жените: Престанете со солзите, благовестете им на апостолитњ, повикајте пеејќи: Воскресна Христос Господ, Кој благоволи, како Бог, да го спаси родот човечки“ (седален воскресен во недела на Утрена, глас 8-ми).

На 09.10.2022 година, во Седумнаесеттата недела по Педесетница и на празникот Упокоение на св. ап. и ев. Јован Богослов и на преп. Нил Калабриски, Неговото Високопреосвештенство Митрополитот Плаошко-струшки и Дебарско-кичевски и Администратор Австралиско-сиднејски г. Тимотеј, во сослужение на протоерејот-ставрофор Никола Христоски, протоерејот Стевче Тошевски, свештеникот Александар Матески и протоѓаконот Николче Ѓурѓиноски, изврши осветување на храмот „Св. вмч-чка. Варвара“ во селото Долно Добреноец, Кичево. Темелот на храмот е осветен од раката на Митрополитот Тимотеј на 05.08.2000 година, а истиот се градеше по иницијатива на Иницијативниот одбор, чии членови се: Никоски Добре, Алексоски Стојан, Софрониоски Бранко, Николоски Бранко, Крстески Светозор, Митрески Бранко, Здравески Стојче, Стефаноски Мито, Софрониоски Даме и Крстески Трајче, а истиот се изгради со донациите на локалното население и на сите добронамерни верници од пошироката околина. Откако беше осветен храмот, се отслужи и првата света Литургија, а по завршувањето на Литургијата, Митрополитот Тимотеј се обрати кон верниот народ со пригодна беседа, којашто ви ја пренесуваме во целост.

На 02.10.2022 година, во соборниот храм „Св. вмч. Георгиј“ во Нови Сад, Србија, беше отслужена света архиерејска Литургија, на којашто беа свечено канонизирани светиот Иринеј (Ќириќ) Исповедник и светите Бачки новомаченици, пострадани за време на Втората светска војна. На Литургијата чиноначалствуваше Неговата Светост Патријархот Српски г. Порфириј, во сослужение на голем број архиереи од СПЦ, како и голем број гости од останатите помесни цркви, меѓу кои: Митрополитот Василиј Аркадиски од Антиохиската православна црква, Митрополитот Будимпештански Иларион од Руската православна црква, Митрополитот Крфски Нектариј од Грчката православна црква, Архиепископот Михаловско-кошички Георгиј од Словачка, а од Македонската православна црква сослужуваа: Митрополитот Преспанско-пелагониски и Администратор Австралиско-новозеландски Петар, Митрополитот Плаошко-струшки и Дебарско-кичевски и Администратор Австралиско-сиднејски Тимотеј и Митрополитот Повардарски Агатангел. По завршувањето на Литургијата, патријархот Порфириј, како и домаќинот на оваа свечена богослужба Епископот Иринеј, се обратија кон неизбројниот верен народ, и се заблагодарија на сите кои дојдоа да служат и да земат учество во овој свет чин. Од името на нашата Епархија им го честитаме овој светол и радосен ден, а по молитвите на новопрогласените светии, Господ Бог секогаш да нѐ води на патот на Неговите заповеди. На многаја лета!

„Овци словесни на Јагнето и Пастирот, на огнот и на лути маки бевте предадени, и се покажавте како рамни по чест на ангелите. Затоа сите ние со весели срца го празнуваме вашиот свет спомен, богомудри девици“ (седален на Утрена на празникот на св. мч-чки Вера, Надеж и Љубов и мајка им Софија).

На 30.09.2022 година, денот на славниот спомен на светите маченички Вера, Надеж и Љубов и мајка им Софија, во катедралниот храм „Св. Софија“ во Охрид, беше отслужена света архиерејска Лиртургија, на којашто чиноначалствуваше Неговото Блаженство Митрополитот Скопски и Архиепископ Охридски и Македонски и на Јустинијана Прима г.г. Стефан, во сослужение на Неговото Високопреосвештенство Митрополитот Плаошко-струшки и Дебарско-кичевски и Администратор Австралиско-сиднејски г. Тимотеј, Неговото Преосвештенство Епископот Хераклејски г. Климент, архимандритот Нектариј, протоереј-ставрофорите Никола Христоски, Сашо Богданоски и Димче Ѓорѓиески, игуменот Агатон, свештениците Љупчо Бакрачески и Александар Димоски, еромонахот Никодим, протоѓаконите Николче Ѓурѓиноски и Александар Димитријов и ѓаконите Драган Иванов и Марко Спасовски. Денешниот собир беше прилика да се прослават и 20 години од преосветувањето на овој наш прекрасен и неповторлив храм на Мудроста Божја, а по тој повод, Архиепископот Стефан се обрати кон верниот народ со пригодна беседа, којашто ви ја пренесуваме во целост.