НАЈНОВО ОД ДЕБАРСКО-КИЧЕВСКАТА ЕПАРХИЈА

„Крсту Христов, надеж на христијаните, наставнику на заблудените, пристаниште на брануваните, во борбите - победа, тврдина на вселената, лекару на болните, воскресение на мртвите, помилуј нѐ“ (стихира по степена на Утрена на Крстовден).

На 27.09.2021 година, денот кога го прославуваме споменот на празникот Воздвижение на чесниот и животворен Крст - Крстовден, во храмот „Пресвета Богородица - Перивлепта“ во Охрид, беше отслужена света архиерејска Литургија, на којашто чиноначалствуваше Неговото Високопреосвештенство Митрополитот Плаошко-струшки и Дебарско-кичевски и Администратор Австралиско-сиднејски г. Тимотеј, во сослужение на архимандритот Нектариј, протоерејот-ставрофор Никола Христоски, еромонахот Никодим, свештеникот Васил Михајлоски, протоѓаконот Николче Ѓурѓиноски и ѓаконот Марко Спасовски. По завршувањето на Литургијата, Митрополитот Тимотеј се обрати кон верниот народ со пригодна беседа, којашто интегрално ви ја пренесуваме.

„Јоаким и ана со твоето свето раѓање, Пречиста, се ослободија од срамот на бездетноста, а Адам и Ева - од распадливоста смртна. Затоа и празнуваат луѓето твои, избавени од гревовната вина, кога ти пеат: Неплодна (жена) раѓа Богородица и, на Животот наш - Хранителката“ (кондак на Утрена на Рождетсво на Пресвета Богородица).

Торжествената прослава на Рождеството на Мајката Божја беше крунисана на 21.09.2021 година, во манастирот „Пресвета Богородица Пречиста“ во Кичево, со света архиерејска Литургија, на којашто чиноначалствуваше Неговото Високопреосвештенство Митрополитот Плаошко-струшки и Дебарско-кичевски и Администратор Австралиско-сиднејски г. Тимотеј, во сослужение на протоереј-ставрофорите Никола Христоски и Илија Димитриевски, свештениците Горан Ставрески, Александар Матески и Павел Крцоски, еромонахот Еразмо, протоѓаконот Николче Ѓурѓиноски и ѓаконот Марко Спасовски. По завршувањето на Литургијата, беше извршен чинот на Мал водосвет и беше осветено коливото, а беше прекршен и празничниот колач. Потоа, Митрополитот Тимотеј се обрати кон верниот народ со пригодна беседа, којашто ви ја пренесуваме во целост.

„Денес неплодната врата се отвора, и пред неа врви божествената врата девствена. Денес благодатта почнува да раѓа плод, кој на светот му ја објавува Божјата Мајка, со чија помош се собираат небесните и земниите, за спасение на душите наши“ (песна на Господи повикав... на Вечерна на Рождество на Пресвета Богородица).

Прославувањето на Рождеството на Богомајката и оваа година започна во манастирот „Рождество на Пресвета Богородица“ во с. Г. Манастирец, Македонски Брод, во попладневните часови, каде што беше отслужен Акатист на Пресвета Богородица, на којшто чиноначалствуваше Неговото Високопреосвештенство Митрополитот Плаошко-струшки и Дебарско-кичевски и Администратор Австралиско-сиднејски г. Тимотеј, во сослужение на протоерејот-ставрофор Никола Христоски, свештениците Саше Костадиноски и Горан Ставрески, еромонахот Ефросиниј и ѓаконот Марко Спасовски. Празнувањето продолжи во вечерните часови во манастирот „Пресвета Богородица Пречиста“ во Кичево, каде беше отслужена празнична Вечерна богослужба, на којашто чиноначалствуваше Митрополитот Тимотеј, во сослужение на протоереј-ставрофорите Никола Христоски и Илија Димитриевски, протоерејот Стевчо Тошевски, свештениците Горан Ставрески, Александар Матески, Александар Крстаноски и Павел Крцоски, еромонахот Еразмо, протоѓаконот Николче Ѓурѓиноски и ѓаконот Марко Спасовски. По завршувањето на Вечерната богослужба, Митрополитот Тимотеј се обрати кон многубројниот верен народ со пригодна беседа, којашто интегрално ви ја пренесуваме.

Почитувани верници на нашата света Дебарско-кичевска епархија и на Македонската православна црква - Охридска архиепископија, во прилог Ви го пренесуваме Соопштението на САС на МПЦ-ОА, а во врска со пописот во нашата држава, којшто е во тек.

„Славното отсекување на главата Претечева беше еден вид Божја промисла, за и на оние во адот да им го проповеда доаѓањето на Спасителот. Затоа нека реди Иродијада, која го испроси беззаконото убиство, бидејќи таа не го возљуби законот Божји, ниту вечниот живот, туку лажниот и привремениот“ (кондак на Утрена на празникот Отсекување на чесната глава на славниот пророк, Претеча и Крстител Јован).

На 11.09.2021 година, денот кога манастирот „Св. Јован Крстител“ - Бигорски манастир, го слави патронот и заштитникот на оваа наша света обител, беше отслужена света архиерејска Литургија, на којашто чиноначалствуваше Неговото Високопреосвештенство Митрополитот Плаошко-струшки и Дебарско-кичевски и Администратор Австралиско-сиднејски г. Тимотеј, во сослужение на Неговото Високопреосвештенство Митрополитот Тетовско-гостиварски г. Јосиф, Неговото Преосвештенство Епископот Антаниски г. Партениј, игумен на манастирот, архимандритот Доситеј, протоерејот-ставрофор Никола Христоски, еромонасите Макариј, Еразмо, Ефросиниј, Кирил и Анатолиј, свештениците Илија Поп Гонов, Миле Алексоски и Павел Крцоски, протоѓаконот Николче Ѓурѓиноски и ероѓаконите Порфириј и Силуан. По завршувањето на Литургијата, беше извршен чинот на Мал водосвет, а беше осветено и коливото и се прекрши и празничниот колач. Митрополитот Тимотеј се обрати кон многубројниот верен народ со пригодна беседа, којашто подолу интегрално ви ја пренесуваме. На самиот крај, беше промовирана и новата книга за Бигорскиот манастир, „Иконата на Бистра - Закрилник на православието“, дело на г-дин Киро Кипроски, во која се опфатени многу настани од последниве 25 години од животот на манастирот, пропратени со прекрасни фотографии што сведочат за богатиот живот на истиот.