НАЈНОВО ОД ДЕБАРСКО-КИЧЕВСКАТА ЕПАРХИЈА

„Со скромноста го надмина богатството богатејќи се со вистинско смирение; твоите солзи се бисери, а смиреното воздржание - непрестајно принесување и расудување, со вистина, љубов и мир; славно се издигна во царството“ (песна од канонот на Утрена на св. Константин Кавасила).

На 31.10.2018 година, денот кога го прославуваме свештениот спомен на св. ап. Лука и на св. Константин Кавасила, во храмот „Пресвета Богородица - Перивлепта“ во Охрид, беше отслужена света архиерејска Литургија, на која чиноначалствуваше Неговото Високопреосвештенство Митрополитот Дебарско-кичевски и Администратор Австралиско-сиднејски г. Тимотеј, во сослужение на протоереј-ставрофор Никола Христоски, протоерејот Љупчо Симиџиески, свештениците Љупчо Бакрачески и Сашо Целески и протоѓаконот Николче Ѓурѓиноски. По завршувањето на Литургијата, Митрополитот Тимотеј се обрати кон верниците со пригодна беседа, која ви ја пренесуваме во целост. 

„Мироточителка на Пресветиот Дух си се покажала, мајко, со излевањето на мирото на благомирисните и мудри твои учења, уништувајќи ја злосмрадната гнилеж на прелеста, и со твојот нарав, Параскево, намирисувајќи ја Црквата, која вика непрестајно: Со песни Те славиме, Христе, во вековите“ (песна од Канонот на Утрена на преподобна Параскева).

На 27.10.2018 година, кога го прославуваме споменот на преподобната мајка Параскева - света Петка, во манастирот „Св. Петка“ во Велгошти, Охрид, беше отслужена света архиерејска Литургија, на која чиноначалствуваше Неговото Високопреосвештенство Митрополитот Дебарско-кичевски и Администратор Австралиско-сиднејски г. Тимотеј, во сослужение на свештениците Никола Кипријанов и Сашо Целески и протоѓаконот Николче Ѓурѓиноски. По завршувањето на Литургијата, Митрополитот Тимотеј се обрати кон верниот народ со пригодна беседа, која интегрално ви ја пренесуваме.

На 22.10.2018 година, во храмот „Св. вмч. Димитриј“ во с. Издеглавје, општина Дебарца, Охрид, беш отслужен Парастос во спомен на учесниците на Првиот свештенички собир во с. Издеглавје, општина Дебарца, Охрид, кои ги поставија темелите за возобновувањето на Охридската архиепископија во лицето на Македонската православна црква. На Парастосот чиноначалствуваше Неговото Блаженство Митрополитот Скопски и Архиепископ Охридски и Македонски и на Јустинијана Прима г.г. Стефан, во сослужение на Митрополитот Дебарско-кичевски и Администратор Австралиско-сиднејски г. Тимотеј, Митрополитот Преспанско-пелагониски и Администратор Австралиско-новозеландски г. Петар, како и повеќе свештенослужители од целата Македонска православна црква - Охридска архиепископија. По завршувањето на Парастосот, Архиепископот Стефан се обрати со пригодна беседа пред присутните. На Парастосот присуствуваа повеќе свештенослужители од целата наша црква, а присутен беше и Директорот на Комисијата за односи со верските заедници и религиозни групи во Р. Македонија, г-дин Даријан Сотировски. Како благодарност кон големото верско, но и патриотско дело, тука ќе ги споменеме имињата на учесниците на Првиот свештенички собир: протоереј-ставрофор Вељо Манчевски - парох Дебарски, протоереј-ставрофор Кирил Стојаноски - парох во Локов, протоереј-ставрофор Антим Попоски - парох на Прва слатинска парохија, свештеник Томо Попоски - парох на Втора слатинска парохија, свештеник Зафир Јованоски - парох Годивски, свештеник Ристо Тасески - парох Арбиновски, свештеник Ламбе Попоски - парох Велмешки, свештеник Ристо Тасески - парох Белчишки, свештеник Матеј Попоски - парох во Злести и свештеник Силјан Ристоски - парох Врбјански. На покојните да им биде вечен споменот и вечна благодарност за нивното христијанско и патриотско дело. Амин!

„Ти се збогати со благодатта Божја, а делата ги сообрази со твоето име, Бенедикте, и се покажа како угодник на Христа Бога во молитвите и постовите, исполнет со даровите на Духот Божји. Ти си бил и исцелител на болните, и прогонител на вразите, и брз заштитник на душите наши“ (кондак на преп. Бенедикт Нурсиски).

На 16.10.2018 година, на празникот на св. свештеномаченик Дионисиј Ареопагит и на св. Јован Хозевит, Неговото Високопреосвештенство Митрополитот Дебарско-кичевски и Администратор Австралиско-сиднејски г. Тимотеј, во сослужение на протоереј-ставрофор Никола Христоски и протоѓаконот Николче Ѓурѓиноски, изврши осветување на параклисот посветен на преподобен Бенедикт Нурсиски во манастирот „Рождество на Пресвета Богородица“ во с. Г. Манастирец, Македонски Брод. По осветувањето на параклисот, беше отслужена света архиерејска Литургија, по која Митрополитот Тимотеј му посака на настојателот на манастирот, монахот Бенедикт, уште многу успеси во возобновувањето на манастирот. 

„Блескајќи со твојот омофор повеќе од сончевите зраци, ја осветуваш Црквата и луѓето, и го изгонуваш мракот на гревовите наши со твојата посета, Богородице, на твојот Син и Бог за нас молејќи се“ (песна од канонот на Утрена на Покров на Пресвета Богородица).

На 14.10.2018 година, во Дваесеттата недела по Педесетница, и на празникот Покров на Пресвета Богородица и свети Јован Кукузел, во параклисот „Покров на Пресвета Богородица“ во Резиденцијата на Дебарско-кичевската епархија во Охрид, беше отслужена света архиерејска Литургија, на која чиноначалствуваше Неговото Високопреосвештенство Митрополитот Дебарско-кичевски и Администратор Австралиско-сиднејски г. Тимотеј, во сослужение на свештениците Горан Ставрески и Љупчо Бакрачески и протоѓаконот Николче Ѓурѓиноски. По завршувањето на Литургијата, беше извршен чинот на Мал водосвет и беше прекршен празничниот колач, а Митрополитот Тимотеј се обрати кон верните чеда со пригодна беседа, која интегрално ви ја пренесуваме.