НАЈНОВО ОД ДЕБАРСКО-КИЧЕВСКАТА ЕПАРХИЈА

На 28 октомври 2024 година, во просториите на Административниот центар на Дебарско-кичевската епархија во Охрид, Неговото Високопреосвештенство Митрополитот Плаошко-струшки и Дебарско-кичевски и Администратор Австралиско-сиднејски г. Тимотеј ги пречека нашите ценети гости од Австрија, кои дојдоа во нашата Татковина за да се запознаат со природните, културните и духовните убавини на нашата земја. Ценетите гости беа предводени од Амбасадорот на Австрија во Македонија, г-дин Мартин Памер, и од Генералниот директор на ЕВН Македонија, г-дин Волфганг Мајер. Меѓу посетителите беа и Прелатот г. Антон Хеслингер, старешина на Манастирот Клостернојбург, и проф. Фолфганг Вон Бандион, голем канцелар на католичкиот ред на Свети цар Константин, како и други ценети гости.

„Си се јавила, преподобна Параскево, како друго сонце на Црквата, осветлувајќи ја со молњите на твоите чудеса, и просветлувајќи ги оние кои со вера ти викаат: Милоста Твоја, Христе, на сите подај им ја“ (седален на утрена на празникот на преп. Параскева - Петка).

На 27.10.2024 година, во Осумнаесеттата недела по Педесетница и денот кога го прославуваме празникот на преподобната Параскева - Петка, Неговото Високопреосвештенство Митрополитот Плаошко-струшки и Дебарско-кичевски и Администратор Австралиско-сиднејски г. Тимотеј, во сослужение на протоерејот-ставрофор Никола Христоски, свештеникот Драган Шуминоски и протоѓаконот Николче Ѓурѓиноски, изврши осветување на храмот „Св. Петка“ во с. Волино, општина Дебрца, Охрид. Храмот започна да се гради во 2010 година, по иницијатива на Ѕвезда Иваноска, а со поддршка на Црковниот одбор од селото. Истиот се изгради со донациите на месното население, на волинската дијаспора и на сите добронамерни верници од пошироката околина. Откако беше осветен храмот, се отслужи и првата Литургија, на којашто присуствуваше голем број верници од селото и од пошироката околина. По завршувањето на Литургијата, Митрополитот Тимотеј се обрати кон верниот народ со пригодна беседа, којашто интегрално ви ја пренесуваме.

На 14.10.2024 година, денот кога го прославуваме празникот Покров на Пресвета Богородица, празник кој уште еднаш го покажува постојаното покровителство и застапништво на Мајката Божја за сите кои ѝ се обраќаат со искрена прозба и молитва, во манастирот „Покров на Пресвета Богородица“ во с. Ѓунис, кај Крушевац, Р. Србија, беше отслужена света архиерејска Литургија, на којашто чиноначалствуваше Неговата Светост Патријархот Српски г. Порфириј, во сослужение на Неговото Блаженство Архиепископот Охридски и Македонски г. Стефан, на Митрополитите Плаошко-струшки и Дебарско-кичевски и Администратор Австралиско-сиднејски г. Тимотеј, Преспанско-пелагониски и Администратор Австралиско-новозеландски г. Петар, Бачки г. Иринеј и Нишки г. Арсениј, на Епископите Хераклејски г. Климент и Јенополски г. Никон, како и многубројно свештенство од двете цркви. Пред неизбројниот верен народ свои обраќања имаа и Патријархот Српски г. Порфириј и Архиепсикопот Охридски и Македонски г. Стефан, а на крајот сите беа поздравени и од домаќинот, Епископот Нишки г. Арсениј, кој на двајцата Поглавари им подари пригодни подароци. Овој манастир има и една историска важност за двете цркви. Имено, во овој манастир, под покровот на Мајката Божја и со нејзина пшомош, беа водени успешните преговори помеѓу двете цркви за обнова на канонското единство. Во продолжение ви пренесуваме дел од братската атмосфера низ фотографии, коишто се преземени од официјалната веб страна на Нишката епархија. На многаја лета!

„Опкружувана од божествен сјај на ангелските воинства, и почитувана заедно со хоровите на пророците и апостолите, како Мајка Божја, посети не нас - твоите слуги, молејќи Го Христа нашиот Бог, да ни дарува милост голема“ (седален на Утрена на празникот Покров на Пресвета Богородица).

На 14.10.2024 година, денот кога го прославуваме празникот Покров на Пресвета Богородица, Неговото Високопреосвештенство Митрополитот Плаошко-струшки и Дебарско-кичевски и Администратор Австралиско-сиднејски г. Тимотеј, во придружба на протоѓаконот Николче Ѓурѓиноски, зеде учество во богослужбата во манастирот „Покров на Пресвета Богородица“ во Ѓунис, Р. Србија, а на која началстуваше Неговата Светост Патријархот Српски г. Порфириј, во сослужение на нашиот Архиепископ Охридски и Македонски г. Стефан, и повеќе архиереи и свештенослужители од двете цркви. Со благослов на Митрополитот Тимотеј, свештеникот Роберт Илијевски отслужи света Литургија во капелата „Покров на Пресвета Богородица“ во Митрополитската резиденција во Охрид. По завршувањето на Литургијата, беше извршен чинот на Мал водосвет и беше прекршен празничниот колач, а во името на нашиот Митрополит Тимотеј, отец Роберт ја прочита беседата од Митрополитот упатена до верните чеда. Истата ви ја пренесуваме во целост.

„Исполнети изобилно со врвната мудрост Христова, трите ќерки на Софија и избраната и благоумна мајка, ја посрамија свирепоста и неподносливото лудило на мачителите, изложувајќи ги божествените учења“ (песна од канонот на Утрена на празникот на св. мч-чки Вера, Надеж и Љубов и мајка им Софија).

На 30.09.2024 година, денот кога си спомнуваме на маченичките подвизи и славната смрта на светите маченички Вера, Надеж и Љубов и мајка им Софија, во катедралниот храм „Св. Софија“ во Охрид, беше отслужена света архиерејска Литургија, на којашто чиноначалствуваше Неговото Високопреосвештенство Митрополитот Плаошко-струшки и Дебарско-кичевски и Администратор Австралиско-сиднејски г. Тимотеј, во сослужение на Неговото Преосвештенство Епископот Дељадровско-илинденски г. Јоаким, архимандритот Нектариј, протоереј-ставрофорите Никола Христоски и Александар Димоски, протоерејот Горан Ставрески, свештениците Љупчо Бакрачески и Роберт илијевски, еромонахот Никодим, протоѓаконот Николче Ѓурѓиноски, ероѓаконот Јаков и ѓаконот Марко Спасовски. Овој празничен ден ќе остане запомнет за ѓаконот Марко, кој од раката на Митрополитот Тимотеј беше ракоположен во свештенички чин. Од името на Митрополитот, свештенството, ѓаконството, монаштвото и сиот верен народ од нашата Епархија, му го честитаме свештеничкиот чин на отец Марко, со желби и молитви достојно да служи на светата Црква Христова, за спасение на довереното му стадо и за спасение на неговата душа. По завршувањето на Литургијата, Митрополитот Тимотеј се обрати кон верниците со пригодна беседа, којашто во целост ви ја пренесуваме.