НАЈНОВО ОД ДЕБАРСКО-КИЧЕВСКАТА ЕПАРХИЈА

„Ти си Го видел Пребеспочетното Слово како стои од десната страна на Отецот, и лицето си го исполнил со неискажлива светлина, похвало на апостолите и славо на маченивите; со венец си се украсил со каменувањето и си го примил божествениот крај“ (светилен на Утрена на св. апостол, првомаченик и архиѓакон Стефан).

На 09.01.2023 година, денот кога го славиме споменот на светиот апостол, првомаченик и архиѓакон Стефан, во храмот „Св. Никола“ во Вевчани, беше отслужена света архиерејска Литургија, на којашто чиноначалствуваше Неговото Високопреосвештенство Митрополитот Плаошко-струшки и Дебарско-кичевски и Администратор Австралиско-сиднејски г. Тимотеј, во сослужение на архимандритот Нектариј, игуменот Наум, протоереј-ставрофорите Ристе Ристевски и Игор Никовски, протоереите Митре Попоски и Кирил Јованоски, свештениците Зоран Попоски, Ристе Наумоски, Горан Ставрески, Димитрија Павлески и Александар Димоски и протоѓаконот Николче Ѓурѓиноски. Повод за овој собир во Вевчани беше и Јубилејот на свештеникот Зоран Попоски, кој 40 години им служи на нашата света Црква и на Вевчанската парохија, а по тој повод, Митрополитот Тимотеј го произведе свештеникот Зоран Попоски во протоерејски чин. Од името на Митрополитот Тимотеј, свештенството и монаштвото, и на сите верни чеда на нашата Епархија му го честитаме чинот на прота Зоран, со желби и молитви за крепко здравје и долг живот. По завршувањето на Литургијата, Митрополитот Тимотеј се обрати кон верниците со пригодна беседа, којашто ви ја пренесуваме во целост. 

„Оној што пред ѕвездата Деница се роди од Отецот без мајка, денес на земјата се воплоти од тебе без татко. Затоа ѕвездата им благовести на Мудреците, а ангелите со пастирите го воспеваат твоето неискажливо раѓање, Благодатна“ (кондак на Утрена на празникот Собор на Пресвета Богородоица).

На 08.01.2023 година, во Неделата по Рождество Христово и на празникот Собор на Пресвета Богородица, во храмот „Пресвета Богородица - Челница“ во Охрид, беше отслужена света архиерејска Литургија, на којашто чиноначалствуваше Неговото Високопреосвештенство Митрополитот Плаошко-струшки и Дебарско-кичевски и Администратор Австралиско-сиднејски г. Тимотеј, во сослужение на архимандритот Нектариј, свештениците Димче Азески, Ѓорѓи Блажевски и Љупчо Бакрачески и ѓаконот Марко Спасовски. По завршувањето на Литургијата, беше извршен чинот на Мал водосвет и беше прекршен празничниот колач, а Митрополитот Тимотеј се обрати кон верниот народ со пригодна беседа, којашто интегрално ви ја пренесуваме. 

Божик е радост за целата земја, за сиот свет и сите луѓе, но најискрената радост може да се види кај најмладите, кои со нетрпение го очекуваат овој радосен ден. Како и секоја година, и оваа најмладите дечиња беа израдувани со пригодни Божикни пакетчиња, дарувани од Неговото Високопреосвештенство Митрополитот Плаошкос-трушки и дебарско-кичевски и Администратор Австралиско-сиднејски г. Тимотеј, а овие млади и чисти души искрено му возвратија на дедо Владика на Божикниот поздрав: Христос се роди!

„Денес Христос се раѓа во Витлеем од Дева; денес Беспочетниот влегува во времето, и Словото се воплотува: силите небесни се радуваат, и земјата со луѓето се весели; Мудреците Му принесуваат дарови на Господа, а пастирите Му се восхитуваат на Родениот, а ние непрестајно викаме: Слава на Бога во висините и на земјата мира, меѓу луѓето добра волја“ (хвалитна стихира на Утрена на празникот Рождество Христово).

На 07.01.2023 година, денот кога сите Божји созданија се радуваат, на денот кога дојде спасението за светот - воплотувањето и доаѓањето на земјата на нашиот Спасител, Господ Исус Христос, во храмот „св. вмч. Ѓорѓи“ во Охрид, беше отслужена света архиерејска Литургија, на којашто чиноначалствуваше Неговото Високопреосвештенство Митрополитот Плаошко-струшки и Дебарско-кичевски и Администратор Австралиско-сиднејски г. Тимотеј, во сослужение на архимандритот Нектариј, протоереј-ставрофорите Никола Христоски и Игор Никовски, свештеникот Горан Ставрески, протоѓаконот Николче Ѓурѓиноски и ѓаконот Марко Спасовски. По завршувањето на Литургијата, беше прочитано Божикното послание, испратено до сите верни чеда на Македонската православна црква - Охридска архиепископија од страна на Неговото Блаженство Митрополитот Скопски и Архиепископ Охридски и Македонски и на Јустинијана Прима г.г. Стефан, заедно со членовите на Светиот архиерејски синод на МПЦ-ОА. Истото во продолжение ви го пренесуваме во целост.

„Христе, разумно Сонце на правдата, Ти си засветлил од Дева, и ѕвезда Те покажа сместен во пештера, Тебе - Несместливиот. Мудреците си ги упатил да Ти се поклонат; со нив и ние Те величаме, Животодавче, слава Ти“ (тропар на Вечерна на Рождество Христово).

На 06.01.2023 година, во навечерието на пресветлиот празник на Рождеството Христово, во храмот „Св. Петар и Павле“ во Кичево, беше отслужена празнична Вечерна богослужба, на којашто чиноначалствуваше Неговото Високопреосвештенство Митрополитот Плаошко-струшки и Дебарско-кичевски и Администратор Австралиско-сиднејски г. Тимотеј, во сослужение на протоерејот-ставрофор Никола Христоски, протоерејот Стевчо Тошевски, свештениците Ристе Камбуроски, Александар Матески и Александар Крстаноски и протоѓаконот Николче Ѓурѓиноски. По завршувањето на Вечерната, беа осветени бадниковите гранчиња, а Митрополитот Тимотеј се обрати во преполниот храм со пригодна беседа, којашто интегрално ви ја пренесуваме.