НАЈНОВО ОД ДЕБАРСКО-КИЧЕВСКАТА ЕПАРХИЈА

„Сега ни се јави Спасителовиот Крстител, на пустината красота и печат на пророците, и разумно ги весели мислите на верните, затоа се покажа како Христов Претеча и вистински сведок на Неговото доаѓање. Поради тоа, со духовни песни, заедно да му повикаме на Јована: Пророку и проповеднику на вистината, моли се за нас да се спасиме“ (седален на Утрена на Отсекување на чесната глава на св. Јован Крстител).

Весели се Крстителу, кој го изобличуваш безбожниот Ирод, и на дупите во адот им проповедаш. И оваа година торжествено го прославивме оној за кого Христос кажа дека не се родил поголем меѓу родените од жена. Имено, на 11.09.2022 година, денот кога го празнуваме Отсекувањето на чесната глава на славниот пророк, Претеча и Крстител Јован, во манастирот „Св. Јован Крстител“ - Бигорски, беше отслуена света архиерејска Литургија, на којашто чиноначалствуваше Неговото Високопреосвештенство Митрополитот Плаошко-струшки и Дебарско-кичевски и Администратор Австралиско-сиднејски г. Тимотеј, во сослужение на Митрополитот Тетовско-гостиварски г. Јосиф, Епископот Антаниски г. Партениј, игумен на манастирот, архимандритите Панарет (од Вселенската патријаршија), Матеј (од Грчката православна црква) и Доситеј, протоерејот-ставрофор Никола Христоски, протоерејот Златко Пуреовски, еромонасите Макариј, Еразмо, Ефросиниј и Кирил, свештеникот Миле Ангелоски, протоѓаконот Николче Ѓурѓиноски и ероѓаконите Силуан и Григориј. За прекрасното пеење се погрижија еромонахот Анатолиј и архимандритот Херувим од Грчката православна црква. Оваа торжествена Литургија ќе остане засекогаш во меморијата на ероѓаконот Григориј (Пуреовски), кој од раката на Митрополитот Тимотеј беше ракоположен во еромонашки чин. Од името на Митрополитот Тимотеј, од свештенството, монаштвото и верниот народ, му го честитаме свештеничкиот чин на отец Григориј, со молитви и прозби достојно да врви по избраниот пат. По завршувањето на Литургијата, беше извршен чинот на Мал водосвет, беше осветено коливото и беше прекршен славскиот колач. Пред многубројниот верен народ, со своја пригодна беседа се обрати Митрополитот Тимотеј, а истата ви ја пренесуваме во целост.

По донесената Одлука од 25 август 2022 година на Свештениот собор на Руската православна црква за признавање на автокефалноста на Македонската православна црква - Охридска архиепископија, на 08 септември оваа година, Неговата Сесветост Патријархот Московски и на сите Руси г.г. Кирил испрати писмо до Неговото Блаженство Митрополитот Скопски и Архиепископ Охридски и Македонски и на Јустинијана Прима г.г. Стефан, во кое го известува Неговото Блаженство за прифатената автокефалија. Истото Ви го пренесуваме во целост, преведено на македонски јазик.

На 06.09.2022 година, во манастирот „Св. Наум Охридски“ во Охрид, беше прославен големиот Јубилеј на првата генерација богослови во Македонската православна богословија „Св. Климент Охридски“ во Скопје - 50 години од матура. Домаќин на оваа средба беше Неговото Високопреосвештенство Митрополитот Плаошко-струшки и Дебарско-кичевски и Администратор Австралиско-сиднејски г. Тимотеј, кој имал привилегија да биде дел од овој зародиш на Македонската православна богословија. Средбата беше одбележана со Благодарствена молитва кон Бога, со отслужување на света архиерејска Литургија, на којашто чиноначалствуваше Митрополитот Тимотеј, во сослужение на архимандритот Нектариј, игумен на манастирот, протоереј-ставрофорите Јорданчо Митевски, Илија Димитриевски и Атанас Поповски, свештеникот Јован Саканарски и протоѓаконот Николче Ѓурѓиноски, а присуствуваше и свештеникот Димко Димоски, исто така, член на оваа прва богословска генерација. На Литургијата, со благослов на надлежниот архиереј на Струмичката епархија Митрополитот г. Наум, Митрополитот Тимотеј го одликува во протоерејски чин свештеникот Јован Саканарски, кој по завршувањето на Литургијата се обрати кон присутните со поучно слово. По завршувањето на Литургијата, беше приредена и трпеза на љубовта. 

На 25 август 2022 година, на редовното заседание на Свештениот Синод на Руската православна црква, било проследено Соопштението на Светејшиот Патријарх Московски и на цела Русија Кирил, за доделувањето на автокефалност од Српската православна црква на Македонската православна црква – Охридска архиепископија. Синодот заблагодарил на Господа Бога за разрешувањето врз канонски основи на прашањето за статусот на православната Црква во Северна Македонија. И донел Одлука дека ја признава Македонската православна црква – Охридска архиепископија за автокефална Црква-Сестра, и го впишува името на нејзиниот Претстојател Блаженејшиот Архиепископ Охридски и Македонски Стефан во свештените диптиси. Членовите на Синодот изразиле надеж дека најмладата во семејството на автокефални православни Цркви, Македонската православна црква – Охридска архиепископија, цврсто ќе ја чува во чистота и непорочност светата православна вера и ќе ја пази верноста на православната канонска традиција. Синодот решил и да се известат Неговата Светост Патријарх Српски Порфириј и Неговото Блаженство Архиепископот Охридски и Македонски Стефан за одлуката на Светиот синод.

Соопштение 

Светиот архијерејски синод (САС) на Македонската Православна Црква – Охридска Архиепископија (МПЦ – ОА), на својата редовна седница, одржана на 30 август 2022 година, разгледа повеќе прашања и настани поврзани со актуелниот црковен живот, ја проследи дејноста на црковните воспитно-образовни институции и односите со Помесните Православни Цркви.

Светиот Синод со голема радост и благодарност ја прими веста за прифаќањето на автокефалниот статус на Македонската Православна Црква – Охридска Архиепископија од страна на Руската Православна Црква – Московска Патријаршија (РПЦ – МП) на заседанието на Синодот на РПЦ од 25 август 2022 година, запишувајќи го името на нејзиниот Поглавар, Неговото Блаженство, Архиепископ Охридски и Македонски г. г. Стефан во свештениот диптих.

Одлуката на Синодот на Руската Православна Црква следи по обраќањето на Српскиот Патријарх г. г. Порфириј соопштувајќи ја веста на Рускиот Патријарх г. г. Кирил за автокефалниот статус на сестринската Македонска Православна Црква.

Исто така, Синодот на МПЦ – ОА им благодари на сите други Помесни Православни Цркви кои го прифатија актот на Цариградскиот Патријарх.

Истовремено Синодот апелира да не се наштетува на процесот на признавањето на автокефалниот статус на МПЦ – ОА преку неупатени и злонамерни коментари и нецелосни и умислено искривени информации на поедини таканаречени експерти и аналитичари.

Од канцеларијата на

Светиот архијерејски синод на МПЦ – ОА