НАЈНОВО ОД ДЕБАРСКО-КИЧЕВСКАТА ЕПАРХИЈА

„Безсловесниот Јуда го примаше телото кое ослободува од гревот и божествената крв пролеана за светот. но не се срамеше да ја пие оваа крв што за пари ја продаваше. Тој не умееше да го избегне ова предавство и да вика: Пејте Му на Господа, дела, и превозносете Го во сите векови“ (песна од Канонот на Утрена на Велики Четврток).

На 28.04.2016 година, на Велики Четврток наутро, кога го празнуваме споменот на востановувањето на светата тајна Евхаристија - Тајната Вечера, миењето на нозете, свештената молитва, а си спомнуваме и за предавството Јудино, во манастирот „Св. Климент и Пантелејмон“ на Плаошник во Охрид, беше отслужена света архиерејска Василиева Литургија, на која чиноначалствуваше Неговото Високопреосвештенство Митрополитот Дебарско-кичевски г. Тимотеј, во сослужение на протоерејот Никола Христоски, свештеникот Љупчо Бакрачески и протоѓаконот Николче Ѓурѓиноски. По завршувањето на Литургијата, Митрополитот Тимотеј се обрати кон верниот народ со пригодна беседа, која во целост ви ја пренесуваме.

„Пристапи жената грешна и осквернета, пролевајќи солзи, љубејќи Те и страдањето навестувајќи го: Како ќе Те погледнам, Господи? Зашто Самиот си дошол да ја спасиш блудницата. Мене умрената, воскресни ме од бездната, Ти, Кој го воскресна од гробот четиридневниот Лазар. Прими ме, Господи, мене бедната, и спаси ме“ (стихира на Господи повикав... на Вечерна од Велика среда).

На 27.04.2016 година, во светата и Велика среда, во храмот „Успение на Пресвета Богородица“ - Каменско во Охрид, беше отслужена света архиерејска Литургија на претходноосветени дарови, на која чиноначалствуваше Неговото Високопреосвештенство Митрополитот Дебарско-кичевски г. Тимотеј, во сослужение на архимандритот Нектариј, свештениците Димче Азески, Владо Недески, Роберт Илијевски и Павел Крцоски, протоѓаконот Николче Ѓурѓиноски и ѓаконот Сашо Целески. По завршувањето на Литургијата, свештеникот Димче Азески ги причести верните кои се подготвиле да пристапат кон светиот Путир, а свештеникот Владо Недески им подели нафора на присутните верници. 

„Излезете народи, излезете луѓе, и видете Го денес Царот Небесен, како влегува во Ерусалим на грдо осле, како на возвишен престол: роде јудејски неверен и прељубодеен, пријди и види Го Господа, за Кого пророк Исаија предвиде дека заради нас ќе дојде во тело; ете Го Младоженецот на новиот Сион, и за Неговата чиста и непорочна свадба, мноштво невини деца се собраа фалејќи Го; со нив и ние да ја запееме ангелската песна: Слава во висините, на Оној што има милост голема“ (хвалитна стихира на Утрена на Цветници).

Оној што за престол го има небото, денес, седнат на осле, влегува во Ерусалим, подготвен да ги претрпи срамните унижувања и да ја покаже Својата светла победа над смртта. „Ликувај од радост ќерко Сионова! Ете, Царот твој доаѓа при тебе, кроток, седнат на осле, рожба на ослица“ (Зах. 9, 9). Затоа и нашиот Спасител, Господ Исус Христос, беше воспеан од устите на мноштвото незлобиви дечиња, кои Му викаа: Осана на Синот Давидов, благословен е Оној, што доаѓа во името на Господа. И нас Господи, кои денес го прославивме овој голем празник, со Твоето неискажливо милосрдие, удостој нè да го видиме и Твоето живоносно воскресение и помилуј нè, сега и секогаш и во вечни векови.

„Царството Божјо не е јадење и пиење, туку правда и воздржување со светост. Затоа во него ќе влезат не богатите, туку оние што своето богатство го вложуваат во рацете на сиромашни. Така учи и пророк Давид, велејќи: Праведен е човек кој милува цел ден, кој се насладува во Господа,; тој оди во светлина и нема да се препне. Сето ова се напиша за наша поука, та, постејќи, добро да правиме, а Господ, наместо земни, добра небесни ќе ни дарува“ (Хвалитна стихира на Утрена во Недела од петта седмица на Великиот пост).

На 17.04.2016 година, во Неделата од Петтата седмица на Великиот пост, во храмот „Св. вмч. Ѓорѓи“ во Струга, беше отслужена света архиерејска Василиева Литургија, на која чиноначалствуваше Неговото Високопреосвештенство Митрополитот Дебарско-кичевски г. Тимотеј, во сослужение на архимандритот Нектариј, протоерејот Никола Христоски, свештениците Васко Голабоски и Петре Бојчиноски, протоѓаконот Николче Ѓурѓиноски и ѓаконот Христијан Костоски. По завршувањето на Литургијата, Митрополитот Тимотеј се обрати кон верниот струшки народ со пригодна беседа, која во целост ви ја пренесуваме.  

„Ти која Го роди Лекарот на сите луѓе, радувај се, Богоневесто, жезолу таинствен, од кој процуте цветот неовенлив! Радувај се, Владичице, преку која со радост се исполнуваме и живот наследуваме (песна од Канонот на Утрена во сабота од Петта седмица на Великиот пост). 

На 15.04.2016 година, во петокот од Петтата седмица на Великиот пост, во вечерните часови во храмот „Успение на Пресвета Богородица - Каменско“ во Охрид, според востановениот типик на Црквата, беше отслужена Утрена богослужба, заедно со Акатистот на Пресветата Мајка Божја, на која чиноначалствуваше Неговото Високопреосвештенство Митрополитот Дебарско-кичевски г. Тимотеј, во сослужение на протоерејот Никола Христоски и свештениците Димче Азески и Горан Ставрески. Мноштво верници дојдоа да се помолат на Мајката Божја, знаејќи дека таа има сила пред својот Син, да се помоли и застапи за нас грешните и да ни помага на патот на исполнувањето на Неговите заповеди. Пресветата Владичица нека се моли за сите нас, та очистени и просветени од Светиот Дух, да го дочекаме и светлото Христово Воскресение.