„Кога ја прими од Бога светителската одежда и стана пастир охридски, чудесен Клименте, со твоите божествени зборови и поуки, и со покажаните чудеса, ја преведе во верата цела Македонија. Затоа, сеславни, твојот сесвет спомен го почитуваме“
(хвалитна стихира на Утрена на свети Климент Охридски Чудотворец).
Празнувањето на споменот на Светиот Климент Охридски Чудотворец и Светиот Климент Папа Римски и оваа година свечено се одбележа во Светиклиментовиот манастир на Плаошник во Охрид, почивалиштето на чудотворните мошти на нашиот патрон и учител. Светиот Климент и по своето блажено упокојување продолжува да го благословува својот народ, преку дела, молитви и чудеса исцелувајќи ги од телесните и духовните немоќи, и ги води на патот кон спасението.
Прославата започна претходниот ден, на 07.12.2025 година во манастирот „Св. Климент и Пантелејмон“ на Плаошник во Охрид, кога во вечерните часови беше отслужена празнична Вечерна богослужба на којашто чиноначалствуваше Неговото Високопреосвештенство Митрополитот Дебарско-кичвески г. Георгиј.
Празнувањето продолжи на 08.12.2025 година, во истиот манастир „Св. Климент и Пантелејмон“ на Плаошник во Охрид, кога беше отслужена света архиерејска Литургија, на којашто чиноначалствуваше Митрополитот Дебарско-кичвески г. Георгиј.
